Имрӯз, 29 июн, дар толори варзишии Донишгоҳи славиянии Русияву Тоҷикистон, бахшида ба 80-солагии Мураббии шоистаи Ҷумҳурии Тоҷикистон, Устоди варзиши Иттиҳоди Шӯравӣ, Довари дараҷаи байналмилалӣ Нуралӣ Одинаев мусобиқаи ҷумҳуриявӣ оид ба валейбол миёни ҷавондухтарон баргузор гардид.

Мусобиқаи мазкур бо сабқати тимҳои ҷавондухтарони вилоятҳои Хатлону ВМКБ оғоз шуд ва ин мусобиқа панҷ рӯз идома меёбад.
Дар ифтитоҳи чорабинӣ Нуралӣ Солеҳов, ректори Донишгоҳ ҳозиринро хайрамақдам намуда, Нуралӣ Одинаевро ба муносибати 80-солагияшон табрик намуд ва ба варзишгарон муваффақият таманно намуд.

Назарзода Ризо, муовини якуми раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ифтхорномаи Кумитаро аз номи Аҳтам Абдуллозода, раиси Кумитаи кор бо ҷавонон ва варзиш барои хизматҳои шоён ва саҳми арзанда дар тарғибу ташвиқи ҳайёти солим ва рушди варзиши кишвар ба Нуралӣ Одинаев супорида, ба чорабинӣ ҳусни оғоз бахшид.

Инчунин, намояндаи ВМКБ ифтихорнома ва арзу сипоси Шодихони Ҷамшед, раиси вилоятро ба Н. Одинаев барои ба воя расонидани шогирдони муваффақ дар соҳаи варзиш ва тарбияи насли солим супурд.

Маҳмадализода Абдулло, муовини сардори Раёсати тарбияи ҷисмонӣ ва рушди варзиши Кумитаи кор бо ҷавонон ва варзиш таъкид намуд, ки шумораи дастаҳои иштирокчӣ барои дарёфти ҷоми мазкур сол аз сол меафзояд: “Ҳадаф аз баргузории мусобиқаи мазкур, пеш аз ҳама, рушди валейбол миёни ҷавондухтарон ва оммавигардонии тарзи ҳайёти солим мебошад. Ин мусобиқа ҳамасола гузаронида мешавад ва имсол ин мусобиқа ба 80-солагии соҳибҷом ва 20-солагии Ваҳдати миллӣ рост омад. Баҳри анъанавӣ гардонидани ин мусобиқа Кумитаи кор бо ҷавонон ва варзиш корҳои зиёдеро анҷом додаистодааст ва сол аз сол шумораи дастаҳои иштирокчӣ зиёд мешавад”.

Шодихони Назар, “ҶТ”