Имрӯз дастаи мунтахаби футзали Тоҷикистон таҳти роҳбарии Пайрав Воҳидов, ки дар Ҷоми Осиё-2024 бомуваффақият баромад кард, ба Ватан бармегардад. Даста соати 18:00 вориди Душанбе мешавад.

Дар ин бора аз Федератсияи футболи Тоҷикистон иттилоъ доданд.

Қайд кардан ба маврид аст, ки тими футзали кишвар дар Ҷоми Осиё – 2024 ҳунарнамоии арзандае нишон дода, ба дастовардҳои таърихӣ ноил гашт.

Шогирдони Пайрав Воҳидов тавонистанд бо рафтан ба марҳилаи ниманиҳоии мусобиқаи Ҷоми Осиё – 2024 ба мусобиқаи Чемпионати ҷаҳон оид ба футзал роҳ ёбанд. Ин натиҷа дар тули фаъолияти дастаи мунтахаби футзали кишвар бори аввал ба қайд гирифта шуд. Ҳамакнун футзалбозони мо дар Чемпионати ҷаҳон оид ба футзал-2024, ки аз 14 –уми сентябр то 6 –уми октябр дар Ӯзбекистон баргузор мегардад, иштирок карда, баҳри ба даст овардани мақомҳои арзанда талош мекунанд.