Абдулмаҷид Кудиев - варзишгаре, ки пас аз 17 сол тавонист дигарбора ба Тоҷикистон аз Чемпионати ҷаҳон дар вазнҳои ғайриолимпӣ оид ба гӯштини тарзи озод медал оварад. Ин гӯштингир ҳамагӣ соле қабл ба мунтахаби Тоҷикистон пайваст ва бо гузоро шудани наздики ду сол ба гирифтани натиҷаҳои арзанда ва назаррас шарафёб гардид.

Чемпионати ҷаҳон

Чемпионати мазкур чанде пеш дар шаҳри Тиранаи Албания баргузор гардид. Абдулмаҷид Кудиев бо ҳунару маҳорати воло бо рақибон мубориза бурда, тавонист медали биринҷии ин мусобиқаро ба Тоҷикистон орад.

Мусобиқаи қаҳрамонии ҷаҳони риштаи гӯштӣ дар вазнҳои ғайриолимпӣ дар ҳашт соли охир бори аввал баргузор гардид. Бар асоси низомнома ба мусобиқа он варзишгароне ҷалб гардиданд, ки дар Бозиҳои олимпии Париж - 2024 ширкат надоштанд. Кудиеви 24-сола дар вазни то 70 килограм дар даври аввал тавонист, муқобили намояндаи Муғулистон бо ҳисоби 11 бар 0 пирӯз гардида, рақобатро дар даврҳои баъдӣ идома диҳад. Пас аз шикасти намояндаи муғул варзишгари мо дар даври дуюм бо Рамазон Рамазонови булғористонӣ нерусанҷӣ кард. Дар ин рақобат низ ҳунару маҳорати баланди Кудиев ба ӯ имконият фароҳам овард, то бо ҳисоби бузурги 12 бар 2 рақибашро мағлуб намуда, роҳ пайдо намояд ба марҳилаи баъдӣ ё худ марҳилаи чаҳорякниҳоӣ.

Дар даври чаҳорякниҳоӣ Кудиев бо варзишгар аз кишвари ҳамзабони мо Сино Халилии эронӣ рӯ ба рӯ гардид. Рақобати ин ду варзишгар то ба лаҳзаҳои поёнии мусобиқа қариб якнавохт сурат гирифт. Ҳарду барои баромадан ба марҳилаи баъди - яъне марҳилаи ниманиҳоӣ талош карданд. Дар рақобати баробар варзишгари мо тавонист бо ҳисоби 6 бар 5 ба ҳарифи эронии худ зафар ёфта, роҳи худро ба марҳилаи ниманиҳоӣ ҳамвор созад. Аммо дар даври ниманиҳоӣ аз Нуржока Кайпанови қазоқ бо ҳисоби 2 бар 13 шикаст хӯрда, рақобатҳои худро дар даври тасалобахш идома дод.

Кудиев дар рақобати даври тасаллобахш бо талошҳои зиёд Акаки Кемертелидзеи гурҷиро бо ҳисоби 13 бар 2 шикаст дода, ба гирифтани нишони биринҷӣ дар вазни 70 кг сазовор гардид. Ҳамин тавр, дар вазни зикршуда Нуркожа Кайпанови қазоқ, ки дар марҳилаи ниҳоӣ бар Ёсиносуке Аоягии ҷопонӣ пирӯз шуд, барандаи медали тилло гардид. Варзишгари ҷопонӣ пас аз шикаст дар даври ниҳоии мусобиқа ба гирифтани медали нуқра шараф-ёб гашт. Ҷои сеюми вазни 70 кг бошад насиби Абдулмаҷид Кудиев аз Тоҷикистон ва Иналбек Шериев, намояндаи Русия гардид. Дарвоқеъ, Абдулмаҷид Кудиев бо ин ғалаба, пас аз 17 сол барои Тоҷикистон дар қаҳрамонии гӯштии ҷаҳон медал овард. Чунин медалро қаблан, Юсуф Абдусаломов соли 2007 дар қаҳрамонии ҷаҳон дар риштаи гӯштии тарзи озод дар вазни то 84 кг дар шаҳри Бокуи Озарбойҷон ба даст оварда буд. Ӯ дар мусобиқаи мазкур ба гирифтани медали нуқра сазовор гардида буд.

Кудиев кист?

Абдулмаҷид Кудиев зодаи Доғистони Русия мебошад. Ӯ 13-уми марти соли 2000-ум дар деҳаи Тад-Магитли ноҳияи Ахвахскии Доғистон таваллуд шуда, дар ҳамон ҷо ба воя расидааст. Давраҳои наврасии худро Кудиев дар ин деҳа сипарӣ намудааст. Аз замонҳои наврасии худ ӯ ба гӯштини тарзи озод майлу рағбат дошт ва бо ҳамсолонаш ҳамеша гӯштин мегирифт.

Аввалин мусобиқа

Ин ҳама майлу рағбат сабаб гашт то моҳи июни соли 2014 дар синни 14 солагии худ ба гирифтани аввалин медал аз ин риштаи варзиш мушарраф гашт. Мусобиқаи мазкур дар сатҳи ҷумҳуриявӣ баргузор шуд, ки он ба хотири гиромидошти Кадӣ Абакаров, қаҳрамони Иттиҳоди Шуравӣ байни наврасон ва ҷавонон доир гардид. Кудиев дар он мусобиқа бори аввал ба гирифтани медал сазовор гардид, ки ин медали биринҷӣ буд.

Ғолибиятҳои баъдӣ

Ин буд, ки Кудиев пас аз ду сол шарафи иштирок дар мусобиқоти байналмилалиро низ касб кард. Мусобиқаи мазкур моҳи декабри соли 2016 дар Каспийск барандаи медали биринҷӣ гардид, ки бахшида ба хотири гиромидошти Курамагомед Курамагомедов, собиқ варзишгари гӯштини тарзи озоди Русия баргузор гардид. Ин мусобиқа дар сатҳи байналмилалӣ баргузор гашт ва таҷрибаи хубе буд барои Кудиев то маҳорати худро дар қуваозмоиҳои сатҳи баланд низ санҷад.

Моҳи январи соли 2019 дар Чемпионат оид ба гӯштини озод дар Доғистон ғолиб омада, ба гирифтани аввалин медали заррини худ дар сатҳи ҷумҳурӣ шарафёб шуд. Моҳи сентябри соли баъд аниқтараш соли 2020 бошад, ӯ барандаи медали биринҷии Чемпионати Русия байни ҷавонон гардиду худи ҳамон сол дар Чемпионати Русия байни ҷавонони то 23 сола иштирок кард. Дар мусобиқаи мазкур то марҳилаи ниҳоӣ роҳ ёфта, дар финал аз рақиби худ шикаст хурду ба гирифтани нишони нуқра сазовор гардид. Соли 2021 низ барои Кудиев соли бобарор буд. Дар оғози сол - моҳи январ ӯ дар Чемпионати Доғистон оид ба гӯштини тарзи озод иштирок карда, ба гирифтани унвони қаҳрамонӣ даст ёфт ва солро бо гирифтани ин унвон оғоз кард. Моҳи марти соли 2021 бошад, қаҳрамони мо медали биринҷии чемпионати Русияро моли худ кард.

Пайвастан ба ҳайати мунтахаби Тоҷикистон

Соли 2023 барои Кудиев бо тағйироти ҷиддӣ оғоз ёфт. Ӯ дар моҳи январи соли мазкур ба ҳайати тими мунтахаби Тоҷикистон дар риштаи гӯштини тарзи озод пайваст. Дар муддати камтарин Кудиев тавонист худро ба муҳити варзиши кишвар мутобиқ созад. Ӯ дар худи ҳамон сол яъне соли 2023 дар иштироки аввалини худ дар Чемпионати Тоҷикистон оид ба гӯштини тарзи озод ба гирифтани медали тилло ва унвони қаҳрамонӣ мушарраф шуд.

Дар моҳи феврали соли 2024 бошад бори дуюм ин унвонро дар вазни худ ба даст оварда, қаҳрамони дукарати Тоҷикистон дар риштаи гӯштини озод гашт. Дар тули наздик ба ду соле, ки Кудиев дар тими мунтахаб фаъолият дорад, аллакай ба дастовардҳои муҳим даст ёфтааст. Ӯ дар ин муддате, ки барои варзишгарон чандон замони зиёде нест, худро ба муҳити дигар на танҳо мутобиқ карда тавонист, балки бештар аз онро низ иҷро кард. Гирифтани унвони қаҳрамонӣ дар соли аввали иштирок дар чемпионат ва такрор намудани он дар соли баъдӣ ин кори ҳар варзишгар нест. Барои чунин натиҷаро нишон додан варзишгарон солиёни зиёд талош менамоянд. Аммо бузургтарин дастовард дар корномаи варзишии Кудиев ин гирифтани медали биринҷии Чемпионати ҷаҳон аст, ки аввалин медали ӯ аз чемпионатҳои ҷаҳон маҳсуб меёбад. Ҳамчунин ин медали ӯ барои Тоҷикистон низ медали деринтизор ба шумор меравад. Зеро чуноне дар боло қайд кардем ин медал барои хазинаи варзишии Тоҷикистон пас аз 17 сол дигарбора ворид гардид.

Хулласи калом Кудиев варзишгари бомаҳорату пуртаҷриба буда, дар солҳои оянда аз ӯ барои кишварамон метавон натиҷаҳои аз ин ҳам беҳтару бештарро интизор шуд.

Ҳошим РАҲМАТУЛЛОЕВ, “ҶТ”