Дар Ҷоми Аврупо оид ба ҷудо миёни наврасон паҳлавонони тоҷик сазовори 2 медали биринҷӣ гардиданд.

Мусобиқаи мазкур 3-4 март дар шаҳри Анталияи Туркия доир гардид. Медалҳои тими Тоҷикистонро Ғаниҷон Ғаниев (-73 кило) ва Эмомризо Қурбонов (-90 кило) ба даст оварданд.

Дар мусобиқаи мазкур 381 варзишгар аз 23 кишвар (8 вазн миёни писарон ва 8 вазн миёни духтарон) иштирок намуданд.

Ба ҳайати мунтахаби наврасони тоҷик 9 варзишгар шомил буд, ки миёни писарон рақобат намуданд.

Дар ҳисоби даставӣ ҷумҳурии мо бо ду медали биринҷӣ дар зинаи 14 қарор гирифт.

Тими мизбон – Туркия бо ба даст овардани 7 медали тилло, 5 нуқра ва 13 биринҷӣ ҷои аввалро ишғол кард. Қазоқистон бо 5 медали тилло, 2 нуқра, 7 биринҷӣ ҷои дуюм ва Озарбойҷон бо 1 медали тилло, 3 нуқра ва 1 биринҷӣ мақоми сеюмро сазовор гаштанд.