Муассисаи давлатии “Мактаби ҷумҳуриявии махсуси варзишӣ оид ба намудҳои варзиши обӣ”, ки солҳои зиёд ба таҷдиду азнавсозӣ ниёз дошт, баъди таъмиру тармим имрӯз мавриди баҳрабардорӣ қарор дода шуд. Зимни ифтитоҳи он нахуст мусобиқаи ҷумҳуриявӣ оид ба шиноварӣ бахшида ба ҷашни Наврӯзи байналмилалӣ доир гардид.

Раҳимзода Рамазон Ҳамроҳ, вазири корҳои дохилии кишвар, ки ҳамзамон роҳбарии Федератсияи шиноварии Тоҷикистонро ба уҳда дорад, зимни ифтитоҳи Муассиса варзишгарону мухлисонро ба ҷашни Наврӯзи байналмилалӣ муборакбод намуда, таъкид кард, ки “Дастгирию таваҷҷуҳи бевоситаи Асосгузори сулҳу ваҳдати миллӣ, Пешвои миллат, муҳтарам Эмомалӣ Раҳмон ба варзиш аст, ки сол то сол варзиши тоҷик ба таври зарурӣ рушд намуда, варзишгарони кишвар дар мусобиқаҳои сатҳи байналмилалӣ Парчами Ватани азизамонро муаррифӣ менамоянд. Бо шароити сатҳи байналмилалӣ таъмиру азнавсозӣ гардидани Муассисаи давлатии “Мактаби ҷумҳуриявии махсуси варзишӣ оид ба намудҳои варзиши обӣ” аз ҷониби Ҳукумати кишвар ғамхории навбатӣ нисбати шумо – варзишгарони азиз аст”.

Мусобиқаи варзишӣ бо ташаббуси Кумитаи кор бо ҷавонон ва варзиши назди Ҳукумати кишвар баргузор шуда, шиноваронро аз саросари кишвар ба ҳам оварда буд. Аҳтам Абдуллозода, раиси Кумитаи кор бо ҷавонон ва варзиш иттилоъ дод, ки “Давоми ду моҳи охир таҳти роҳбарии Рамазон Раҳимзода Муассиса аз нав таъмир шуда, дар шаҳру вилоятҳои ҷумҳурӣ ҷиҳати дар сатҳи байналмилалӣ ба роҳ мондану оммавигардонии шиноварӣ ҷораҳои зарурӣ андешида шудаистодаанд. Тибқи нақша дар як муддати кӯтоҳ дар вилояти Суғд аввалин маротиба дар даврони соҳибистиқлолӣ мусобиқаи минтақавӣ, бо иштироки дастаҳо аз кишварҳои Осиёи Миёна, аз рӯи намуди шиноварӣ гузаронида мешавад. Итминони комил дорам, ки бо роҳандозии чунин тадбирҳо мо метавонем дар сатҳи зарурӣ варзиши шиновариро оммавӣ гардонем”.

Қабл аз сабқатҳои инфиродии варзишгарон дар мусобиқаи мазкур Суруди миллӣ садо дод ва варзишгарон дар масофаҳои муайян рақобатҳоро оғоз намуданд.

Дар охири чорабинӣ Раҳимзода Рамазон ва Аҳтам Абдуллозода ҳамроҳи собиқадорони соҳаи варзиш ба ғолибони мусобиқа медалу ифтихорномаҳо тақдим намуданд.