Баҳри истиқболи сазовори ҷашни 30-солагии Истиқлолияти давлатии Чумҳурии Тоҷикистон ва дар доираи 1300 рӯзи корҳои ободонию созандагӣ дар маркази шаҳр ва ҳудуди ҷамоатҳои деҳот иқдомҳои наҷиб пайваста роҳандозӣ гардида истодааст. 

Дар шаҳри Конибодом бо дастгирии Ҳукумати ҷумҳурӣ, мақомоти иҷроияи ҳокимияти давлатии вилоят, шаҳр ва иқдоми неки соҳибкори муваффақ Акмалҷон Шокиров бахшида ба Рӯзи ҷавонони Тоҷикистон толори варзишии “Одилон” ифтитоҳ гардид.

 Ба муносибати ифтитоҳи ин иншооти ҷашнӣ намояндаи Ҳукумати ҷумҳурӣ директори генералии КВД ХМК ҶТ Ҷамшед Табарзода ва раиси шаҳри Конибодом Зафарбек Давлатзода ташриф оварданд.
 
Зафарбек Давлатзода, раиси шаҳри Конибодом, дар толори тозабунёд назди варзишгарон, фаъолон ва роҳбарони ташкилоту муассисаҳо бо суханони табрикотӣ баромад намуда, аз иқдоми соҳибкори муваффақ Акмалҷон Шокиров ёдовар шуда, мавриди истифода қарор гирифтани ин иншооти варзиширо саривақтӣ ва армуғони арзандаи идона ба ҷавонону варзишгарон дар доираи тантанаҳои Рӯзи ҷавонони Тоҷикистон муҳим арзёбӣ намуд. 

Дар интиҳои чорабинӣ соҳибкор Акмал Шокиров аз дастгирии Асосгузори сулҳу ваҳдати миллӣ-Пешвои миллат муҳтарам Эмомалӣ Раҳмон, раиси вилояти Суғд Раҷаббой Аҳмадзода ва раиси шаҳр Зафарбек Давлатзода дар самти дастгирии соҳибкорон ёдовар шуда, боз ваъда дод, ки то ҷашни 30-солагии Истиқлолияти давлатӣ як кӯдакистон ва маҷмааи варзишӣ барои бонувон сохта, ҳамчун армуғони идона тақдим менамояду дар рушду ободии диёр саҳмгузорӣ мекунад.