Рӯзи варзишгарони кишвар, санаи 9-уми август, дар ноҳияи Ашт бо шукуҳу шаҳомати хосса таҷлил гардид.

Дар чорабинӣ раиси ноҳияи Ашт Зариф Мирдадо, директори Маркази таҳқиқоти журналистии Тоҷикистон Хуршеди Атовулло, муовини раиси ноҳия оид ба масъалаҳои иҷтимоӣ-фарҳангӣ Аниса Ҷалилӣ, муовини раиси ноҳия оид ба масъалаҳои иқтисодӣ Ҷамшед Маҳмудзода, роҳбари дастгоҳи раиси ноҳия Хуршед Фарҳодзода, хабарнигори Оҷонсии иттилоотии “Суғднюс” Алишер Толиб, мураббиён, собиқадорони соҳаи варзиш дар ноҳия ва варзишгарони ҷавон иштирок намуданд. 

Нахуст раиси ноҳия Зариф Мирдадо бо меҳмонон дар саҳни Театри мусиқӣ-драммавии ба номи Маҳмудҷон Воҳидов аз рафти даври ноҳиявии Фестивали ҷумҳуриявӣ таҳти унвони “Нон шудам шоистаи ҳар хон шудам” дидан намуданд.

Зариф Мирдадо дар баромади худ бахшида ба Рӯзи варзишгарон иброз дошт, баҳри рушди тарбияи ҷисмонӣ ва варзиш дар соли 2019 аз ҳисоби маблағҳои буҷетӣ зиёда аз 94 ҳазор сомонӣ маблағ ҷудо гардидааст, ки нисбати маблағгузории соли 2017 – 22,5 баробар зиёд мебошад.

Гуфта шуд, бо вуҷуди дастовардҳо дар соҳаи варзиши ноҳия камбудиву норасоиҳо низ ҷой доранд. Норасоии лавозимоти варзишӣ дар мактабу толорҳои варзишӣ, ба таври бояду шояд ба роҳ намондани чорабиниҳои варзишӣ, таблиғи тарзи ҳаёти солим ба рушди бомароми соҳаи варзиш монеа эҷод менамояд. Ҳамзамон, нокифоягии маблағ барои иштирок дар чорабиниҳои варзишӣ садди пешравиҳои соҳа мегардад.

Баъдан Хуршед Атовулло, директори Маркази таҳқиқоти журналистии Тоҷикистон дар вазъияти тантанавӣ ба Зариф Мирдадо раиси ноҳияи Ашт барои ишғол намудани мақоми аввал дар озмуни таъсисдодаи ОИ “Суғднюс”, зери унвони “Лучший председатель города и района” байни раисони шаҳру навоҳии вилоят бо ба даст овардани беш аз 1600 овоз дар бахши “Народный председатель” ҷоизаи таъсисдодаи ОИ “Суғднюс”-ро супорид.

Сипас раиси ноҳияи Ашт ба як қатор собиқадорони соҳаи варзиш ва варзишгарони ҷавон сипоснома ва туҳфаҳои хотиравӣ тақдим намуд.