Дар ноҳияи Мастчоҳ бо иштироки раиси вилояти Суғд Раҷаббой Аҳмадзода майдончаи варзишӣ ба истифода дода шуд.

Раҷаббой Аҳмадзода, раиси вилоят дар маросими ифтитоҳи иншооти варзишӣ гуфт, дар асоси дастуру ҳидоятҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон то соли 2021 дар вилоят даҳҳо иншооти варзишӣ бунёд ва ба истифода дода мешавад. Насли ҷавонро зарур аст, ки аз шароити мавҷуда самаранок истифода намуда, ба тарбияи ҷисмонӣ ва варзиш машғул гарданд.

Майдончаи варзишӣ дар доираи 1300 рӯзи меҳнати зарбдор ба истиқболи 30-солагии Истиқлолияти давлатии Ҷумҳурии Тоҷикистон аз тарафи соҳибкори маҳаллӣ Садруддин Ҳамроев дар Ҷамоати деҳоти Оббурдон бо харҷи 400 000 сомонӣ сохта шуда, он дорои ҳаммоми замонавӣ, утоқ барои ивази либос ва нуқтаи фурӯши нӯшокиҳои ташнашикан мебошад.