Имрӯз дар деҳаи Рошорви ҷамоати деҳоти Савноби ноҳияи Рӯшон як майдонча ва як толори варзишӣ мавриди баҳрабардорӣ қарор дода шуд.

Ин ду иншооти варзишӣ бо дастгирии Мақомоти иҷроияи ҳокимияти давлатии ВМКБ, саҳми муҳоҷирони меҳнатӣ ва шахсони саховатпеша ба истиқболи 35 – солагии Истиқлоли давлатӣ бунёд гардида, бо лавозимоти зарурӣ барои тамрин таъмин шудааст.

Тибқи иттилои масъулин корҳои сохтмонӣ дар иншооти варзишӣ дар муддати як сол бо сатҳу сифти баланд ва сарфи 578 ҳазор сомонӣ ба анҷом расиданд. Дарозии майдончаи варзишӣ 40 ва паҳноиаш 30 метр буда, барои бозиҳои футболи хурд ва волейбол бисёр мувофиқ мебошад. Толори варзишӣ бо дарозии 19 ва паҳноии 9,5 сохта гардида, дар он асосан тамрини гӯштин ба роҳ монда мешавад.

Раиси ВМКБ зимни ифтитоҳи майдончаи варзишӣ ва толори варзишӣ, бо зикри сиёсати ҷавонпарваронаи Пешвои миллат муҳтарам Эмомалӣ Раҳмон таъкид намуд, ки ҷавонони ҷамоат бояд дар пайравӣ аз варзишгарони номдори Ватан ва бо истифода аз шароити муҳайёгардида, неруи ҷисмонию зеҳнии худро такмил дода, номбардору парчамбардори миллат бошанд.

Садоншо Ҷанобилшоев,
“ҶТ”