Эмомалии Нуралӣ ҷудокори номошнои тоҷик ба финали Мусобиқаи байналмилалии ҷудо “Dushanbe Grand Slam - 2025” баромад ва барои нишони заррин мубориза мебард.

Ӯ дар рӯзи аввали “Dushanbe Grand Slam - 2025”, ки имрӯз доир гардида истодааст, дар вазни -66 кг баромад намуд.

Ӯ то роҳ ёфтан ба финали мусобиқа дар рақобати аввал озод буд ва дар даври дуввум Тенго Зиракашвилиро мағлуб намуд. Дар рақобати дуввум, дар даври 1/4 ниҳоӣ ҷудокори мо Артём Штурбабини узбекистониро шикаст дод ва ба даври нимниҳоии мусобиқа роҳ ёфт.

Эмомалии Нуралӣ дар даври нимниҳоӣ бо ҷудокори дигари кишварамон Ёсин Бобокалонов вориди майдони рақобат шуд ва ба ӯ ғолиб баромада, ба финал роҳ ёфт.

Ҷудокори мо рақиби худро дар финали ин мусобиқа интизор аст ва тамоми талошашро барои ба даст овардани медали тиллои ин сабқат равона мекунад.

Ёдовар мешавем, ки маблағи умумии ҷоизаҳои молии мусобиқа 154 ҳазор евроро ташкил медиҳад. Ғолибон дар ҳар вазн (7 вазн байни мардон ва 7 вазн байни занон) бо 5000 евро, барандагони медали нуқра бо 3000 евро ва соҳибони медали биринҷӣ бо 1500 евро қадрдонӣ мешаванд.

Дар “Dushanbe Grand Slam-2025”, ки аз 2 то 4 май идома меёбад, 226 варзишгар (123 мард ва 103 зан) аз 27 давлати ҷаҳону 4 қитъаи олам ширкат доранд.

“ҶТ”