Дилшод Назаров, варзишгари маъруфи кишвар, чемпиони Бозиҳои олимпӣ рӯзи 24 апрел дар шаҳри Доҳаи Қатар маротибаи панҷум ба гирифтани унвони Чемпиони Осиё мушарраф гардид. 

Дар даври финали мусобиқаи гурзандозии Чемпионати Осиё оид ба варзиши сабук 12 нафар иштирок карда, Дилшод Назаров гурзро ба масофаи 76.14 метр ҳаво дод ва ҷои аввалро ишғол намуд. Ашраф Ал-Сайфӣ варзишгари мизбон бо натиҷаи 73.76 метр ҷои дуюм ва Суҳроб Хоҷаев аз Узбекистон бо натиҷаи 72.86 метр ҷои сеюмро сазовор гардиданд.

Бояд гуфт, ин панҷум медали тиллои Дилшод Назаров дар Чемпионати варзиши сабуки Осиё мебошад. Қаблан ӯ солҳои 2009, 2013, 2015, 2017 ба унвони Чемпиони Осиё даст ёфта буд. Ҳамчунин барандаи 2 медали нуқра (2005, 2007) ва як медали биринҷии (2003) Чемпионати Осиё мебошад. Дилшод Назаров, инчунин, 3 маротиба дар Бозиҳои Осиё ғолиб омадааст.