Субҳи имрӯз, 20 май дар саросари кишварамон Дави миллӣ баргузор гардид, ки 436624 (124651 бонувон) нафар сокинони ҷумҳурӣ ба он фаро гирифта шуданд.

Тибқи иттилои Кумитаи кор бо ҷавонон ва варзиш шумораи иштирокчиёни Дави миллӣ дар кишвар нисбати соли гузашта 10 ҳазор зиёд мебошад.

Дар шаҳри Душанбе бошад, зиёда аз 45 ҳазор нафар баҳри иштирок дар ин чорабинии муҳими варзишӣ назди даромадгоҳи маҳаллаи Чорбоғ ҷамъ омаданд.

Дар ифтитоҳи чорабинӣ Абдуҷаббор Раҳмонзода, ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа, Саидзода Тоҷиддин Ниёз, раиси дастгоҳи шаҳри Душанбе оиди оммавияти варзиш ва дастгириҳои бевоситаи Асосгузори сулҳу ваҳдати миллӣ-Пешвои миллат муҳтарам Эмомалӣ Раҳмон дар ин самт суханронӣ намуда, барои иштирокчиён барору комёбиҳо таманно намуданд.

Сипас, аз кормандони Дастгоҳи иҷроияи Президенти Ҷумҳурии Тоҷикистон, то кормандони вазорату идораҳо қатори варзишгарон дар Дави миллӣ фаъолона иштирок намуданд.

Сокинони пойтахт аз даромадгоҳи маҳаллаи Чорбоғ тавассути хиёбони Ҳофизи Шерозӣ то Наврӯзгоҳ дар масофаи зиёда аз 10 км миёни ҳам сабқат намуданд.

Миёни мардон аввалин шуда Меҳрубон Шамсиддинов, донишҷӯи Донишгоҳи тиббии Тоҷикистон ба номи Абуалӣ Ибни Сино ба марра расид. Дар рақобат миёни бонувон Салима Боронова аз Донишкадаи тарбияи ҷисмонӣ ба номи С. Раҳимов ҳарифонашро пушти сар монд.

Ёдовар мешавем, ки Дави миллӣ бо мақсади таҳкими тарзи ҳаёти солим, рушду инкишофи соҳаи варзиш ва оммавияти он байни аҳолӣ, бо ташаббуси бевоситаи Асосгузори сулҳу ваҳдати миллӣ – Пешвои миллат, муҳтарам Эмомалӣ Раҳмон аз соли 2006 баргузор мегардад.