Гӯштингирони тоҷик баҳри иштирок дар Чемпионати Осиё оид ба гуштини озод ва юнонӣ-римӣ, ки 23-28 апрели соли равон доир мегардад, ба шаҳри Сиани Ҷумҳурии мардумии Чин мераванд. 

Қувваозмоиҳо аз рӯи ду равияи гӯштин – тарзи озод миёни мардҳову бонувон ва юнонӣ-римӣ миёни мардон дар 30 категорияи вазнӣ сурат мегиранд. Ҷумҳурии моро дар ин мусобиқа 13 варзишгар - 10 нафар дар равияи тарзи озод, 3 нафар дар равияи юнонӣ-римӣ намояндагӣ хоҳанд кард. 

Чемпионати Осиё барои варзишгарон як замина барои Чемпионати ҷаҳон, ки моҳи сентябр дар Нурсултон (Остона) мегузарад, маҳсуб меёбад. Яъне дар Чемпионати ҷаҳон он варзишгароне иштирок карда метавонанд, ки дар чемпионатҳои минтақавӣ ширкат карда бошанд. Дар Нурсултон 5 варзишагари беҳтарин дар ҳар вазн соҳиби аввалин роҳхат ба Бозиҳои олимпии Токио-2020 аз рӯи ин намуд мегарданд.

Ҳайати дастаи мунтахаби Тоҷикистон дар Чемпионати Осиё – Сиан-2019:

Гӯштини тарзи озод:
57 кило – Ҳикматулло Воҳидов
61 кило – Ҷамшед Шарифов
65 кило– Абулқосим Файзиев
70 кило– Сорбон Абдулҳаев
74 кило – Ғуломҷон Шарифов
79 кило – Аъзамҷон Юсуфов
86 кило – Баҳодур Қодиров
92 кило– Фаридун Одилов
97 кило – Искандари Рустам
125 кило– Фарҳод Анақулов

Сармураббӣ – Абдурозиқ Олимов

Гӯштини юнонӣ-римӣ:
67 кило – Мубинҷон Ахмедов
77 кило – Ҳабибҷон Зуҳуров
87 кило – Тоҳир Охонов

Сармураббӣ – Фаррух Беков