Дилшод Назаров, қаҳрамони феълии Бозиҳои олимпӣ, дар Бозиҳои XVIII тобистонаи осиёӣ  соҳиби медали нуқра шуд.

Гурзандози машҳури тоҷик шоми 26 август дар варзишгоҳи «Gelora Bung Karno Main Stadium»-и шаҳри Ҷакарта гурзро ба масофаи 74 метру 16 сантиметр ҳаво дода мақоми дуюмро соҳиб гардид. Медали Дилшод Назаров авалин нишони тими мунтахаби Тоҷикистон дар Бозиҳои XVIII тобистонаи осиёӣ аст.

Мақоми аввал насиби Ашраф Ал-Cайфи, варзишгари 23 солаи Қатар бо натиҷаи 76 метру 88 сантиметр шуд.

Зенаи сеюмро Сӯҳроб Хоҷаев, варзишгари Ӯзбекистон бо нишондоди 74 метру 06 сантиметр касб намуд.

Варзишгари дигари тоҷик Абдурауф Мӯсоев дар мусобиқаи мазкур иштирок намуда, бо натиҷаи 58 метру 95 сантиметр дар зинаи ёздаҳум қарор гирифт.

Дар намуди гурзандозӣ миёни мардон 12 варзишгар иштирок дошт: дунафарӣ аз Қатар, Тоҷикистон ва Чин, якнафарӣ аз Индонезия, Кореяи Ҷанубӣ, Малайзия, Тайланд, Ӯзбекистон ва Эрон.

Дилшод Назаров аз ин пеш се маротиба (соли 2006 дар Доҳаи Қатар, натиҷааш - 74.43, 2010,  Гуанжоуи Чин – 76.44, 2014 Инчони Кореяи Ҷанубӣ - 76.82) унвони қаҳрамони Бозиҳои тобистонаи осиёиро ба даст овардааст.