Табрикоти Аҳтам Абдуллозода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон бахшида ба Рӯзи варзишгарон Тоҷикистон

Парчамбардорон, собиқадорон ва мураббиёни варзиш, мухлисону дӯстдорони соҳа.

Рӯзи варзишгаронро ба ҳамаи Шумо номбардорон ва парчамбардорони Тоҷикистони азиз самимона таҳният гуфта, бароятон дар арсаи расидан ба дастовардҳои шоёни варзишӣ ва муаррифии бештари кишвар барору комёбӣ орзумандам.

Боиси хушнудист, ки дар Тоҷикистони азиз ҳамасола 10 август ҳамчун Рӯзи варзишгарон бо шукӯҳу шаҳомати хосса, бо роҳандозии як қатор чорабиниҳои оммавию варзишӣ, бо ҷалби тамоми варзишгарону мураббиён ва ҷаванон таҷлил мегардад ва ба тақвими ҷашнҳои миллии кишвар ворид шудани он гувоҳ аз рушди соҳаи тарбияи ҷисмонӣ ва варзиш дар мамлакат мебошад. Ҳамчуни таҷлили ин рӯз баёнгари он аст, ки ташаккул бахшидани варзиш ва дастгирӣ намудани варзишгарон дар меҳвари сиёсати пешгирифтаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор дорад.

Дастгирию пуштибонии рӯзафзуни Пешвои муаззами миллат муҳтарам Эмомалӣ Раҳмон ба хотири пешрафт ва рушд бахшидани соҳаи варзиш ва дастгирии ҳамешагии варзишгарон тамоми шароиту имкониятҳоро фароҳам овардааст, ки варзишгарони мо дар дохилу хориҷи кишвар, дар мусобиқаҳои сатҳи ҷаҳонӣ иштирок намуда, шарафи давлату миллатамонро ба зинаҳои баланду чашмрас расонанд.

Ба роҳ мондани тадбирҳои шоиста ва сазовори таҳсин дар самти таҷдиду азнавсозӣ ва бунёду ба истифода додани як қатор маҷмааву варзишгоҳҳо дар тамоми манотиқи кишвар гувоҳ аз таваҷҷуҳи ҳамешагии Роҳбари давлат дар ин самт аст. Ҳамчунин, таъсиси Ҷоизаи Президенти Ҷумҳурии Тоҷикистон барои ғолибои мусобиқаҳои байналмилалӣ ва эҳёи намудҳои варзиши миллӣ шаҳодати онанд, ки дастгирӣ ва рушд бахшидани соҳаи варзиш як қисмати сиёсати ҷавонпарваронаи Пешвои муаззами миллатро ташкил медиҳад. Ҳамин ғамхориҳои падарона нисбати ҷавонону варзишгарон буд, ки бо ба даст омадани истиқлолияти комил тарбияи ҷисмонӣ ва варзиш яке аз самтҳои афзалиятноки сиёсати иҷтимоии Ҳукумати мамлакат пазируфта шуда, тамоми санадҳои дахлдор ба хотири таъмини оммавияти варзиш, таҳкими тарзи ҳаёти солим, мусоидат намудан ба омодакунии варзишгарони касбӣ қабул ва амалӣ мешаванд.

Дар партави сиёсати варзишпарваронаи Пешвои муаззами миллат Кумитаи кор бо ҷавонон ва варзиш чун ниҳоди масъул ҳамарӯза корҳои сохтмониву барқарорсозии иншоотҳои варзишӣ, сафарбаркунии варзишгарон ба мусобиқаҳои сатҳи дохилӣ ва минтақавию байналмилалиро ба роҳ мондааст. Нишондоду оморҳои назаррас гувоҳи онанд, ки варзиши тоҷик ҳар як соату дақиқа рӯ ба пешравӣ ниҳодааст. Танҳо соли ҷорӣ дар шаҳру навоҳии кишвар 125 иншооти гуногуни варзишӣ сохта ба истифода дода шуд. Бо шумули иншоотҳои дар ин давра сохта шуда, шумораи умумии иншоотҳои варзишии кишвар ба 9835 адад расида, дар онҳо имкон аст, ҷавонони зиёде ба тамрин ҷалб карда шаванд.

Ба хотири оммавигардонии варзиш ва ҷалб кардани наврасону ҷавонон ба намудҳои гуногуни варзиш дар шаш моҳи соли ҷорӣ 4600 мусобиқаҳои гуногун, аз қабили чемпионатҳои Ҷумҳурии Тоҷикистон, мусобиқаҳои ҷумҳуриявӣ, мусобиқаҳои интихобии вилоятӣ, минтақавӣ ва шаҳриву ноҳиявӣ баргузор гардид, ки дар онҳо ҳудуди 734 ҳазор варзишгар иштирок ва қувваозмоӣ кардаанд. Шумораи умумии чорабиниҳои варзишии доиркардаи кумита ба 6446 адад мерасад, ки дар онҳо қариб 1,3 миллион наврасону ҷавонон ва аҳолии кишвар ҷалб шудаанд. Аз онҳо ҳудуди 25 фисадашонро занону бонувон ташкил медиҳанд. 

Бо мақсади муаррифии варзиши тоҷик варзишгарони ҳайати дастаи мунтахаби кишвар танҳо дар чанд моҳи соли ҷорӣ ба 65 мусобиқаҳои сатҳи байналмилалӣ 284 нафар ҷалб шудаанд. Дастовардҳои варзишгарон низ ба маротиб зиёд шуда, шумораи умумии медалҳои ба дастовардаи варзишгарони мо аз мусобиқаҳои сатҳи байналмилалӣ дар нимсолаи аввали соли сипаришуда ба 231 адад мерасад. Аз ин шумора 108 медали тилло, 16 медали нуқра ва 105 медали биринҷӣ ба хазинаи варзишии кишвар ворид гардидааст, ки нисбат ба ҳамин давраи соли гузашта 134 медал бештар аст.

Ба умеди дастовардҳои аз ин бештар ва сазовор будан ба ғамхориҳои ҳамешагии Пешвои муаззами миллат муҳтарам Эмомалӣ Раҳмон бори дигар Шумо варзигарони азиз, ҷавонмардону парчамбардорони кишварро бо самимияти беинтиҳо ба ифтихори Рӯзи варзишгарон сидқан шодбош мегӯям. Таманнои онро дорам, ки Шумо варзишгарони бонангу номус минбаъд низ барои ноил шудан ба дастовардҳои беназир ва парафшон намудани Парчами давлатӣ дар бузургтарин майдони мусобиқаҳои байналмилалӣ минтақавию дар канори ташаббусҳои Пешвои муаззами миллат ҳамеша муваффақ гардед.

Бигузор дасти Шумо ҳамеша боло бошад!