Дар доираи рубрикаи “Дар меҳмонии “Ҷавонони Тоҷикистон тасмим гирифтем, бо Беҳрӯз Хоҷазода варзишгаре, ки соли 2017 варзишгари сол эълон шуда, дар риштаи варзиши гуштини самбо, вазни 74 кило қаҳрамони ҷаҳон гардид, суҳбате дошта бошем. Беҳрӯз соли 2017 дар Чемпионати Осиё дар шаҳри Тошканд дар вазни 68 кг,  Бозиҳои 5-уми Осиёӣ дар шаҳри Ашқободи Ҷумҳурии Туркманистон дар вазни 74 кг сазовори ҷои аввал гардида, ноябри ҳамон сол дар мусобиқоти қаҳрамонии самбои ҷаҳон шаҳри Сочии Русия вазни то 74 кило дар қувваозмоии ниҳоӣ бар паҳлавони Беларус Степан Попов пирӯз омада ба унвони қаҳрамони ҷаҳон даст ёфтааст.

Шуҳрат Ҷононов: Дар ин шабу рӯз Беҳрӯз пайи кадом корҳост? 

-Барои муваффақ шудан дар мусобиқаи балналмилалӣ, ки дар кишвари Канада мегузарад, имрӯзҳо рӯзе 2 маротиба тамрин карда истодаам. 

Гулҷаҳон Низомова: Нахустин мусобиқаи сатҳи ҷаҳоние, ки дар он ширкат варзидаед, кадом аст?

-Ширкат дар мусобиқаҳои байналмилалиро аз соли 2013 оғоз кардам. Он замон дар Бозиҳои қаҳрамонии Осиё дар шаҳри Сеули Корея медали биринҷӣ ба даст оварда будам.

Сиёвуш Ҳамроев:  Як орзуи кӯдакиатон, ки ҷомаи амал напушидааст? 

-Ман ҳамеша орзу доштам, ки қаҳрамони Бозиҳои олимпӣ шавам. Фақат ҳамин орзуям то ҳол ҷомаи амал напушидааст. Чандест дар пайи онам, ки роҳхат ба Бозиҳои олимпии Токио-2020-ро ба даст орам. 

Муҳаммадалӣ Сафаров: Аввалин нафаре, ки бо ӯ гӯштин гирифтед кист? 
-Далер Холов аввалин нафарест, ки бо ӯ гӯштин гирифтаам. Айни ҳол ӯ аз соҳаи варзиш дур шудаву пайи корҳои дигар аст. 

Дилфузаи Раҷаб: То даме, ки ба варзиш пайвастед, кӣ шудан мехостед?
 
-Ҳар киро аз баҳри коре сохтанд,
Меҳри онро дар дилаш андохтанд.

Орзуи ҳамешагии ман варзишгар шудан буд ва ҳаст. Ҳамеша кӯшишу ғайратам барои муваффақ шудан дар ин соҳа буд. Ман гумон намекунам, ки дигар кас шуда метавонистам ё мехостам. 

Фирӯз Сафаров: Дар интихоби варзиш роҳнамои шумо кист? Худатон, хонавода ва ё...?

-Муҳимтарин нақшро дар дастовардҳои ман хонаводаам доранд. Дастгирии падару модар ва хешовандон рози аслии пирӯзиҳои ман аст. Ман ҳамчунин аз мураббии худ бисёр сипосгузорам, ки барои рушду камол ва комёбиҳоям ёриву пуштибонияшро дареғ надоштанд.

Ситора Раҷабиён: Чӣ чиз Шуморо ба маънии имрӯзааш Беҳрӯз Хоҷазода кард?

-Устуворӣ дар роҳи интихоб карда ва бовар доштан ба худ. Агар ҳамин ду чиз дар фитрати дилхоҳ нафар бошад, метавонад дар ҳар ҷодае муваффақ бошад.

Манучеҳр Мардонов:  Агар имрӯз шуҳрати варзишии Беҳрӯз поён ёбад, ба чӣ кор андармон хоҳад шуд?  

-Агар аз мусобиқаҳо маҳрумам кунанд ё бароям садгузорӣ ҳам шавад, ман аз варзиш ҳеҷ гоҳ рӯ нахоҳам тофт. Шояд мураббӣ шавам ё дар кадом гӯшае чанд ҷавону наврасеро ҷамъ ораму ба онҳо нозукиҳои гӯштинро омӯзонам.

Меҳрона Бозорова: Як дӯсти беҳтарини Беҳрӯз кист? 
 
-Саидмуъмин Обидов, писари мураббиву устодам Обидов Садриддин. Мо солҳои зиёдест бо ҳам рафиқу ҳатто фаротар аз бародарем.

Ҷамшед Наботов: Беҳрӯз доири чӣ бештар андеша мекунад? 
 
-Аслан як варзишгари ҳирфаӣ барои фикр кардан вақти кам меёбад. Варзишгар бояд ҳамеша дар амал бошад, на ин ки бештар фикр кунад. Ман низ чун як варзишгари касбӣ агар лаҳзае моломоли  андеша шавам, ҳатман доири муваффақияти бештар касб кардан дар ин соҳа меандешам.

Маҳина Мирзоева: Оё хоб дидан дар ҳаётатон аҳамият дорад. Агар ҳа, хоби охирини дидаатон кадом аст? 

-Аминам, ки хоб дар ҳаёти дилхоҳ нафар метавонад, нақш дошта бошад. Хоби охиринамро намедонаму вале ман дар хобҳоям низ гӯштиву гӯштингириро мебинам.

Фирӯзи Расул: Беҳрӯз Хоҷазода аз чӣ афсус мехӯрад?
 
-То ҳол иттифоқе ба миён наомадааст, ки аз он афсус хурам.
 
Сино Тоҳир: Мо фаҳмидем, ки Шумо қариб, ки дар дарсҳои донишкада иштирок намекардаед, ин воқеият дорад? 

-На. Ман дар кулли дарсҳои донишкада ба ғайр аз давраҳое, ки ба мусобиқаҳо сафарбар мешудам, ширкат мекардам. Дар давраи мусобиқаҳо бо дастур ва иҷозатномаи Кумитаи кор бо ҷавонон ва варзиш маро аз дарсҳо озод мекарданд.

Аъзам Садриддинов: Дар Чемпионати ҷаҳон оид ба самбо вақте зӯрозмоӣ мекардед ва тавонистед, ки пирӯзии қаҳрамони номдори тоҷик Саидмуъмин Раҳимовро такрор кунеду пас аз 42 сол парчами Тоҷикистонро бар фарози ҷойгоҳи қаҳрамонони самбо барафрозед, чӣ эҳсосе дар ин лаҳза шуморо фарогир буд?  

-Ин мусобиқа бароям муҳимтарин қувваозмоӣ буд ва ният доштам, дар он медали тилло ба даст оварам. Ҳангоме ки дар зӯрозмоии ниҳоӣ рақиб дастамро дар қуфли оринҷ гирифт, ман ба табло назар кардам 19 сония монда буд. Ҳама тавону неруямро ҷамъ карда, то охир тоқат кардам. Дар ин вақт номи ман дар табло рӯшан шуд. Дигар натавонистам ашкҳои шодиямро нигаҳ бидорам.

Фотимаи Ҳошим: Худатонро дар варзиш ёфтед? 

-Агарчанде бисёриҳо таърифам мекунанд, меҳнатҳоямро қадр мекунанд, вале то ҳануз дар пеши худам ба камолоти варзишӣ нарасидаам. Ман то кунун дар ҷустуҷӯи худам. 

Умеди Муҳаммад: Аз худатон чӣ мондан мехоҳед? 

-Ягона чизе, ки аз мардон мемонад, номи нек аст. Ман низ чун як ҷавонмард аз худ номи нек гузоштанияму халос.

Мардон Исмонов: Аз ҳама зарбаи сахти хӯрдаатон дар зиндагӣ кадом аст? 

-Ё ман то ҳол дар зиндагӣ ба он ҷойҳое нарасидаам, ки гармиву сардии дунёро чашам ё бояд шукронаи толеи баландам намоям, ки то ҳол аз зиндагӣ ҳеҷ зарбае нахӯрдаам.

Зарринаи Беҳрӯз: Баробари варзиши самбо боз ба кадом навъи варзиш шавқ доред? 

-Ман дар баробари гуштингирӣ инчунин ба муштзанӣ ва футбол низ пайваста машғул мешавам.

Ҷонона Фатҳуллоева: Оё арзанда аст, ки як зиндагиро ба варзиш бахшем? 

-На танҳо арзанда, балки боиси ифтихор аст, вақте як зиндагӣ ба варзиш бахшида мешавад. Барои варзишгар варзиш зиндагӣ ва тамоми ҳастӣ аст. Аз ҷумла, барои ман ҳам.

Мубориз Ҷаббаров: Табиист, ки вақти муҳориба аз беруни майдон садоҳои гуногун ба гӯшатон мерасад. Онҳоро Шумо чӣ гуна қабул мекунед? 

-Дар рафти мусобиқаҳо банда танҳо ба кори худ андармон мешавам. Ҳаёҳуву доду фарёди мухлисон агарчанде ба варзишгар рӯҳи тоза мебахшад, вале лаҳзае аз рақобат фориғ шудану ба он таваҷҷуҳ намудан, варзишгарро ноком мегардонад. 

Муниса Исмоилова: Дар ҳаёти худ чи чизро иваз кардан мехоҳед? 

-Ҳоло ҳеҷ чизе барои иваз кардан надорам. Ҳама чизе, ки то ҳол ба он даст ёфтаам, бароям басандааст. 

Хуршеди Назаралӣ: Киро қаҳрамон меҳисобед? 

-Ҳар нафаре, ки дар роҳи худ устувор асту аз роҳи ҳалол зиндагиашро пеш мебарад ва метавонад тариқи он ба ҷомеа нафъе расонад, пеши ман қаҳрамонист. Қаҳрамонӣ истеъдоди хоссаву инсони ғайриодӣ буданро талаб намекунад. Дар роҳи рост рафтан қаҳрамонист.

“Ҷавонони Тоҷикистон”: Як орзуи ниҳоии Беҳрӯз чист? 
-Қаҳрамони олимпӣ шудан.