Бо мақсади дар сатҳи баланд таҷлил намудани Рӯзи Президенти Ҷумҳурии Тоҷикистон ва баланд бардоштани маҳорати касбии варзишгарон дар толори варзишии деҳаи Барушони ҷамоати Назаршоҳ Додхудоеви ноҳияи Рӯшон байни ҷавонони ҷамоатҳои ноҳия мусобиқаи кушоди ноҳиявӣ аз намуди волейбол доир гашт.

Ба гуфтаи Қаландар Давлатмамадов, мудири Бахши кор бо ҷавонон ва варзиши ноҳия дар мусобиқа ҳашт дастаи ҷамоатҳои М. Абдулвосиев (тимҳои “Деҳ”, “Шидз”), Н. Додхудоев (“Вамд”, “Барушон”, “Дерушон”, “Дерзуд”) ва ҷамоати Рушон (тимҳои “Вамар”, “Шуҷанд”) баҳри ба даст овардани зинаи аввал талош намуданд.

Ҳамин гуна баъди қувваозмоиҳо тимҳои “Дерушон” ва “Барушон” аз гурӯҳи А ва “Вамар” - у “Шидз” аз гурӯҳи Б ба даври нимниҳоӣ роҳхат гирифтанд. Аммо ба даври ниҳоӣ бошад “Барушон” ва “Дерушон” роҳ ёфтанд.

Даври охир миёни ин дастаҳо шадиду диданӣ ҷараён гирифта, дар натиҷа “Барушон” бо ҳисоби 3 – 2 бар дастаи рақиб дастболо гашт ва ҷои аввалро ба даст овард. Дастаҳои ғолиб (“Барушон” – у “Дерушон”) бо мукофотпулии бахш қадрдонӣ гардиданд.