Дар арафаи таҷлил аз Рӯзи варзишгарон дар тамоми гӯшаву канори ҷумҳурӣ масъулини соҳа ба аёдати собиқадорони соҳаи варзиши мамлакат рафта, аз рӯзгору пайкор ва таҷрибаи ғании онҳо ба варзишгарони наврасу ҷавон пайғом расонида, хотири ҳар яке аз онҳоро болида мегардонанд.

Ин навбат Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар якҷоягӣ бо дигар масъулини соҳа дар шаҳри Панҷакент собиқадори соҳаи варзиши кишвар, шахсияте, ки бо донишу таҷриба дар рушду камолёбии чандин варзишгарон саҳми бориз гузоштааст Сино Рофиевро аёдат намуданд.

Сино Рофиев яке аз он чеҳраҳои барҷастаи варзишии кишвар аст, ки бо заҳмати содиқона, иродаи қавӣ ва меҳнати тулонӣ дар омода намудани варзишагрони касбӣ саҳми арзанда гузошта, парчамбардори ҳақиқии мактаби варзиши тоҷик аст.

Раиси Кумита, собиқадори соҳаро ба ифтихори Рӯзи варзишгарон самимона шодбош гуфта, барояш саломатӣ ва умри пурбаракатро таманно намуд.

Инчунин, раиси Кумита дар шаҳри Панҷакент Шавкат Абдуллоев - мураббии мактаби варзишӣ ва собиқадори пуртаҷрибаи соҳаи варзиши кишварро аёдат намуда, эшонро ба ифтихори Рӯзи варзишгарони Тоҷикистон самимона шодбош гуфтанд.

Маврид ба тазаккур аст, ки бо таҷрибаи беш аз чанд даҳсола дар майдонҳои варзишӣ, Шавкат Абдуллоев на танҳо ҳамчун мураббии кордону омӯзгори варзида шинохта шудааст, балки ҳамчун раҳнамо ва илҳомбахши садҳо варзишгарони ҷавон дар рушди соҳаи варзиши тоҷик нақши арзишманд гузоштааст.