Дар деҳаи Пахтакори шаҳри Конибодом 15 июн бо иштироки раиси вилояти Суғд Раҷаббой Аҳмадзода бахшида ба ҷашни 30 – солагии Истиқлоли давлатии Ҷумҳурии Тоҷикистон майдончаи варзишӣ ба истифода дода шуд.

Иншооти варзишӣ бо маблағи 200 ҳазор сомонӣ сохта шуда, аз он минбаъд сокинони деҳаи мазкур метавонанд, истифода баранд.

Раиси вилояти Суғд зимни суҳбат бо сокинон таъкид кард, ки дар вилоят 2732 иншооти варзишӣ мавҷуд буда, барои машғул шудан ба варзиш ва тарбияи ҷисмонӣ шароити зарурӣ фароҳам оварда шудааст. Дар доираи омодагиҳо ба ҷашни таърихии 30-солагии Истиқлоли давлатӣ дар вилоят бунёди садҳо иншооти варзишӣ ба нақша гирифта шуда, танҳо дар 5 моҳи соли ҷорӣ 18 иншооти нав, аз ҷумла 14 майдончаи варзишӣ, 3 толори варзишӣ ва 1 маҷмааи варзишӣ мавриди истифода қарор гирифтааст.