Акмал Убайдов муштзани тоҷик дар рӯзи 11-умин Чемпионати Осиё, ки дар Таиланд ҷараён дорад, барандаи нишони тилло гардид. Ин аввалин нишони тиллои Тоҷикистон дар мусобиқаи мазкур мебошад.

Акмал Убайдов зери вазни 60 кг дар финал намояндаи Ҷопон Сота Накайамаро бо ҳисоби 4:1 мағлуб намуд ва аввалин нишони заррини чемпионатро ба гардан овехт ва қаҳрамони Осиё шуд.

Убайдов дар роҳ ба финал муқобили намояндаи Қазоқистон Билбарс Жехен ва намояндаи Украина Айдер Абдураимов зафар ёфта буд.

Ҳамин тавр, пас аз 5 сол Акмал Убайдов барои Тоҷикистон аз Чемпионати Осиё медали тилло меорад. Охирин маротиба Баҳодур Усмонов соли 2019 аз Чемпионати Осиё соҳиби медали тилло шуда буд.

Ҳамчунин, дар таърихи бокси Тоҷикистон соли 2005 Ҷаҳон Қурбонов, Анвар Юнусов соли 2011 ва Баҳодур Усмонов соли 2019 барандагони медали тилло дар мусобиқаҳои Чемпионати Осиё мебошанд.

Ёдовар бояд шуд, ки қаблан муштзанони тоҷик, Шукрат Саломатов, Шаҳобҷон Шукуров, Аҳмадҷон Саидов дар рӯзи 9-уми Чемпионати Осиё дар дар шаҳри Чиангмайи Таиланд сазовори нишони биринҷӣ гардида буданд. Аз байни онҳо Парвиз Каримов ва Акмал Убайдов ба финал роҳ ёфтанд.

Яҳё МАҲМАДНАБИЕВ, “ҶТ”