Варзишро яке аз муҳим-тарин василаи муаррификунандаи давлату миллат миёни оламиён медонанд. Ҳамасола миллиардҳо доллар сарф менамоянд, то варзишгаронашон чӣ дар ҳайати даставӣ ва чӣ дар ҳайати инфиродӣ дастовардеро соҳиб гарданду ватанашонро муаррифӣ кунанд. Тоҷикистон низ, ки ҷузъе аз ҷомеаи мутамаддин аст, барои боз ҳам бештар муаррифӣ сохтани худ миёни аҳли башар ба варзишгарони касбиву дастаҳои пурқуввати варзишӣ эҳтиёҷ дорад. Вале аз чӣ бошад, ки имрӯз дар кишвар аз 56 намуди варзиш дастаҳои мунтахаб фаъолият доранду натиҷаҳо ҳамоно дар бисёре аз онҳо чандон назаррас нест. Мушкил дар чист?

Бобати масъалаи мазкур ва ҳамзамон оид ба рушди варзиш дар кишвар ва пешрафту муваффақияти дастаҳои мунтахаби варзишии мамлакат суҳбате доштем, бо сардори шуъбаи кор бо дастаҳои мунтахаби дастгоҳи марказии Кумитаи кор бо ҷавонон ва варзиши назди Ҳукумати Ҷумҳурии Тоҷикистон Суҳроби Акбаршо.

- Имрӯз дар Тоҷикистон чанд дастаи мунтахаби варзишӣ бо фарогирии чӣ миқдор варзишгар амал менамоянд?

- Айни замон аз 56 намуди варзиш мо дастаҳои мунтахаби худро дорем, ки ин шумора беш аз 2,5 ҳазор варзишгарро миёни наврасону ҷавонон ва калонсолон дар бар мегирад. Боз намудҳои дигари варзиш низ ҳастанд, ки барои ҷомеаи варзишгарони мо нав буда, дар ҳоли рушд қарор доранд. Аз ҷумла, намудҳои варзиши муҳорибавӣ. Ҳарчанд ки таваҷҷуҳи ҷавонон ба ин намуди варзиш рӯз аз рӯз меафзояд, вале то ҳол дар кишвар мо аз намудҳои варзиши омехта, ба монанди UFC, MMA ва EFC дастаи мунтахаб надорем ва корбарӣ низ бо онҳо то андозае мушкил аст. Аз ин лиҳоз, Кумитаи кор бо ҷавонон ва варзиш ҳамчун мақомоти ваколатдори давлатӣ дар соҳаи варзиш бо ташкилоти ҷамъиятии Федератсияи муҳорибаҳои гуногуншакли Ҷумҳурии Тоҷикистон шартномаи ҳамкорӣ бастааст ва дар ҳамбастагӣ бо роҳбарияти ин федератсия Шуъбаи кор бо дастаҳои мунтахаб нақшаи кориро дар соли ҷорӣ роҳандозӣ хоҳад намуд.

- Чуноне ки ба мушоҳида мерасад, фаъолияти на ҳама дастаҳои мунтахаб назаррас аст. Барои чӣ?

- Дар воқеъ, на ҳамаи дастаҳои мунтахаби варзишии мо фаъолияти хубу назаррас доранд. Аз теъдоди умумии онҳо, ки 56 дастаро дар бар мегиранд, танҳо 10-15 дастаро метавон беҳтар гуфт. Аз ҷумла, мунтахабҳои ҷудо, таэквандо, футбол, шоҳмотбозон, қаиқронон, бокс ва якчанд дастаҳои дигари варзишӣ, ки фаъолияташон хуб асту метавон онҳоро намудҳои афзалиятноки варзиш номид. Аммо намудҳои дигари варзиш низ ҳастанд, ки то ба ҳол ба дастовардҳои намоёни байналмилалӣ мушарраф нагардидаанд, вале дар таъмини оммавияти варзиш саҳмгузоранд. Як чизро фаромӯш набояд созем, ки натиҷа ва бурду бохти ҳар як соҳаи варзиш пеш аз ҳама ба фаъолияти федератсияи он ва мураббиёнаш алоқаманд аст. Зеро федератсия ташкилоти ҷамъиятӣ аст ва он бояд дар ин масъала бештар талош намояд, варзишгаронашро аз ҳар ҷиҳат рӯҳбаланд намояду дар рушди соҳа ҷалб кунад. Вале бархе аз федератсияҳои варзишии мо имрӯз на танҳо фаъолияти хуб надоранд, балки корбариашон ҳатто ба таври зарурӣ ба роҳ монда нашудааст. Инчунин мо ташкилоту идораҳои давлатӣ ҳуқуқ надорем, ки бевосита фаъолиятамонро бо федератсияҳои байналмилалӣ ба роҳ монем, аммо ин имкониятро ҳар як федератсияҳои варзишии мо доранд ва метавонанд, дар асоси ҳамкорӣ бо федератсияҳои байналмилалии худ татбиқи босамари корашонро ба роҳ монад.

- Барои федератсияҳои варзишӣ ва дастаҳои мунтахабе, ки фаъолияташон дар сатҳи паст қарор дорад ва оммавияти варзишро таъмин карда наметавонанд, кумита кадом тадбирҳоро рӯи кор овардааст?

- Ҳар чизе ки дар салоҳияти кумита ва махсусан шуъбаи дастаҳои мунтахаб аст, иҷро намуда истодаем. Баҳри ҷоннок намудани муносибатҳои корӣ ва дарёфти чеҳраҳои нави варзиш дар федератсияҳои мазкур тамоми имкониятҳоро рӯи кор овардаем. Масъулини федератсияҳоро ҳамеша таъкид менамоем, ки кумита барои иҷрои салоҳиятҳои худ омода аст.

- Солҳои охир дастовард-ҳои назарраси мунтахаби варзишгарони маъюби мамлакат зиёд ба назар мерасад. Вале се мушкилии умдаи онҳо-надоштани толорҳои махсуси варзишӣ, идораи корӣ ва дастгирии онҳое, ки имкони иштирок дар Бозиҳои олимпиро доранд, то ҳанӯз ҳалли худро наёфтааст. Оё аз ҷониби кумита ва сохторҳои марбутаи он дар ин самт ягон чораандешӣ шудааст?

- Вобаста ба фаъолияти варзишгарони маъюби мамлакат Кумитаи параолимпии Ҷумҳурии Тоҷикистон аст. Дар ҳоле ки Кумитаи параолимпӣ худаш барои худ шароити корӣ фароҳам оварда наметавонад, пас мо чӣ гуна ба он умед бандем? Онҳо ташкилоти ҷамъиятии худмаблағгузор ҳастанд ва яке аз ӯҳдадориҳояшон ин аст, ки бояд сарпарастонро ёфтаву бештар ҷалб намоянд. Инчунин, ҳамкориҳояшонро бо федератсияву кумитаҳои байналмилалӣ бештар ба роҳ монанд. Ҳарчанд имрӯз дар мамлакат толорҳои махсуси варзишӣ барои варзишгарони маъюб надорем, вале дар таҳияи лоиҳаҳои нави варзишие, ки сохта мешаванд, варзишгарони маъюб ба инобат гирифта мешаванд. Мисоли равшани ин гуфтаҳо маҷмааи обии Қасри теннис аст, ки он ҷо барои варзишгарони маъюб шароитҳо фароҳам оварда шудааст.

- Ғайр аз ду варзишгари мо, ки аз намуди бокс ҳунарнамоӣ мекунанд, дигар касе ба гирифтани роҳхати Бозиҳои олимпии навбатӣ мушарраф нагардидааст. Ба кадом варзишгарон боз метавон умед баст, ки роҳхати Бозиҳои олимпиро ба даст меоранду шарафи варзиши тоҷикро боло мебаранд?

- Умедҳо зиёд аст. Аз ҷумла, Шаҳриёр Даминов аз намуди қаиқронӣ, ки аллакай холҳояш низ дар рейтинги ҷаҳонӣ ба гирифтани роҳхати Бозиҳои олимпӣ мутобиқат мекунад ва тамринҳои дастаҷамъӣ низ аз ин намуди варзиш хуб ба роҳ монда шудааст. Дар ҳоле ки аз ягон соҳа варзишгарони мо холҳои гузаришро барои иштирок дар Бозиҳои олимпӣ ба даст наоранд, мо метавонем аз дигар кишварҳо варзишгаронро харидорӣ намоему аз номи Тоҷикистон баромад намоянд.

- Барои боз ҳам рушд намудани варзиш дар дастаҳои мунтахаб ва боз ҳам бештар ба даст овардани натиҷаҳои назаррас чӣ бояд кард?

- Ягона нафаре, ки бо ғуруру ифтихори миллӣ парчами миллатро боло мебардорад, ин варзишгар аст ва пешравии ҳар як варзишгар аз мураббии даста вобастагии зиёд дорад. Барои ҳамин моро мебояд, то дар ин соҳа бештар заҳмат бикашем, мураббиёнамон бо диду назари нав фаъолиятро пеш баранд ва варзишгаронамон бо ҳиссу ифтихори ватандорӣ заҳмат бикашанду дар баланд бардоштани мавқеъ ва обрӯю эътибори давлату миллат худро масъул шуморанд.

Қиёмиддин МАҲМАДҶОНОВ, "ҶТ"