21–22 ноябри соли ҷорӣ дар Ҳонг-Конги Чин Чемпионати Осиё оид ба қаиқронӣ баргузор шуд, ки дар он варзишгарони Тоҷикистон бо нишон додани маҳорати баланд ва омодагии ҷиддӣ ба гирифтани 9 медал (5 тилло, 1 нуқра ва 3 биринҷӣ) даст ёфтанд, ки натиҷаи назаррас барои тимҳои калонсолон, ҷавонон ва наврасон арзёбӣ мегардад.

Дар рақобатҳои байни калонсолон дар масофаи 3400 метр дар каноэи якнафара Шаҳриёр Даминов ҷойи аввалро соҳиб шуд. Тимофей Емилианов аз Қазоқистон ҷойи дуюм ва Бобоҷонов Амирҷон аз Тоҷикистон ҷойи сеюмро гирифтанд. Дар масофаи 16 800 метр бошад, ҷойи аввалро варзишгари Қазоқистон Тимофей Емилианов ба даст овард, ҷойи дуюм ба Шаҳриёр Даминов ва ҷойи сеюм ба Бобоҷонов Амирҷон расид.

Дар сабқатҳои ҷавонони то 23-сола низ натиҷаҳои баланд ба даст омаданд. Дар масофаи 3400 метр ва ҳамчунин 13 000 метр дар каноэи якнафара, Бобоҷон Бобоҷонов аз Тоҷикистон ду бор ҷойи аввалро соҳиб шуд. Варзишгарони Ҷопон дар ҳар ду масофа ҷойҳои дуюм ва сеюмро ишғол карданд.

Наврасони тоҷик низ дар ин чемпионат баромади шоён доштанд. Дар масофаи 3400 метр Муҳаммадӣ Раҷабов ҷойи аввалро соҳиб гашт, ҷойи дуюм ба варзишгари Ветнам ва ҷойи сеюм ба Шарипов Фирдавс аз Тоҷикистон тааллуқ гирифт. Дар масофаи 1000 метр боз ҳам Муҳаммадӣ Раҷабов бо натиҷаи беҳтарин пирӯз шуд, ду ҷойи минбаъда ба намояндагони Ветнам расид.

Ин дастовардҳо боз як гоми устувор дар рушди варзиши қаиқронӣ дар Тоҷикистон ба ҳисоб рафта, дар рӯзи пурифтихори миллӣ - Рӯзи Парчами давлатӣ эҳсоси ифтихору ватандӯстии варзишгарону мухлисонро дучанд гардониданд. Варзишгарони тоҷик бо маҳорат, заҳмат ва иродаи қавӣ тавонистанд ном ва парчами кишварро дар арсаи қитъавӣ боз ҳам баланд бардоранд.

Яҳё МАҲМАДНАБИЕВ, “ҶТ”