Дар Чемпионати ҷаҳон оид ба дзюдо, ки дар шаҳри Токиои давлати Ҷопон ҷараён дорад, ду паҳлавони маъруфи кишварамон –Беҳрӯзи Хоҷазода ва Сомон Маҳмадбеков зинаи панҷумро ишғол намуданд.

Ҳар ду варзишгарони тоҷик дар рӯзи сеюми мусобиқаи мазкур зери вазни 73 кило қатори 92 паҳлавонони сайёра барои медалҳо мубориза бурданд.

Ҳунарнамоии паҳлавонони мо воқеан шоистаи ситоиш буд. Онҳо новобаста аз таҷрибаи миёнаи худ бар ҳарифоне дастболо шуданд, ки садрнишинҳо дар вазни 73 кило буданд.

Беҳрӯзи Хоҷазода бар варзишгарони Муғулистон (Тсогбаатар Тсенд Очир), Куба (Магдиел Эстреда), Косова (Акил Гйакова), Чин (Салйинҷиригала) дастболо шуд, дар чорякфинал аз паҳлавони Озарбойҷон Ҳидоят Ҳайдаров мағлуб шуд. Беҳрӯз сипас дар қувваозмоии тасаллобахш бар Тоҳар Битбули исроилӣ ғалаба карда, дар рақобат барои медали биринҷӣ аз варзишгари рус Денис Йартсев шикаст хурд ва мақоми панҷумро ишғол намуд.

Сомон Маҳмадбеков бошад, бар варзишгарон аз давлатҳои Капе Верде (Магнер Мендес), Шведсия (Томи Макиас), Молдова (Виктор Стерпу), Люксембург (Клаудиос Сантос) ғолиб омада, дар чорякфинал аз намояндаи Руссия Денис Йартсев мағлуб шуд. Ӯ сипас дар қувваозмоии тасаллобахш Билол Чилоғлуи туркро шикаст дод.

Сомон дар қувваозмоӣ барои медали биринҷӣ бо паҳлавони Озарбойҷон Ҳидоят Ҳайдаров 12 дақиқа муҳориба карда, мағлуб гардид.

Тоҷикистонро дар вазни 73 килои дзюдо ҷаҳониён этироф мекунанд ва ин бори дигар исботи худро ёфт. 12 сол муқаддам паҳлавони маъруфи кишварамон Расул Боқиев дар Чемпионати ҷаҳон – 2007 дар шаҳри Рио – де-Жанейрои Бразилия мақоми сеюм ва соли 2008 дар Олимпиадаи тобистонае, ки дар шаҳри Лондон доир гардида буд, медали биринҷиро ба гардан овехт.

Беҳрӯз ва Сомон бо ишғоли ҷои панҷум дар Чемпионати ҷаҳон-2019 720 имтиёз барои радабандии ҷаҳонии дзюдо ва 359 имтиёз барои гирифтани саҳмияи олимпӣ ба даст оварданд.