ВАРЗИШ
Якшанбе 26 Май 2024 08:58
10206
Боз киҳо имкони ба даст овардани ин роҳхатро доранд?

Бо наздик омадани тобистон ва муҳимтарин рӯйдоди варзишии сол, яъне Олимпиадаи Париж-2024, ки қарор аст аз 26-уми июл то 11-уми август дар шаҳри Парижи Фаронса доир гардад, рақобати варзишгарон баҳри ба даст овардани роҳхатҳои олимпӣ тезу тунд мегардад.

Варзишгарон бо иштирок дар мусобиқаҳои қоравию байналмилалӣ холҳои олимпии худро меафзоянду як қадам ба Олимпиада наздик мешаванд. Бояд гуфт, ки то кунун чаҳор варзишгари тоҷик роҳи хешро ба Олимпиада ҳамвор намудаанд, ки инҳо Миҷгона Самадова, Давлат Болтаев ва Баҳодур Усмонов дар намуди бокс ва Мунира Абдусаломова дар риштаи таеквандо мебошанд.

Аввалин варзишгаре, ки роҳхати Бозиҳои олимпии Париж-2024-ро аз Тоҷикистон ба даст овард, ин Миҷгона Самадова мебошад.
Дар рӯзи 8-уми Бозиҳои Осиёии Ҳангжоу-2022 муштзанбонуи шинохтаи кишвар Миҷгона Самадова дар вазни -57кг барои роҳ ёфтан ба даври ниманиҳоӣ бо варзишгари Ҷопон қувваозмоӣ намуд.

Дар ин рақобат Миҷгона тавонист бар Сатсуки Ёшизаваи ҷопонӣ пирӯз гардаду ба даври ниманиҳоии Бозиҳои Осиёӣ Ҳангжоу-2022 роҳхат гирифт.

Ин ғалаба натанҳо барои Миҷгона дар Бозиҳои Осиёии Ҳангжоу-2022 умеди медал бахшид, балки аввалин роҳхати Бозиҳои тобистонаи Олимпии Париж 2024-ро миёни варзишгарони Тоҷикистон ба даст овард.

Роҳхати Миҷгона ба Олимпиада барои муштзанони кишвар ҳамсони тумори иқбол гардид, чун баъд аз баромадҳои бо муваффақият дар Бозиҳои 19-уми осиёӣ дар Ҳангжоуи Чин муштзани дигари тоҷик Давлат Болтаев баробари ба даст овардани медали тиллои мусобиқа дуввумин шуда ба Бозиҳои олимпии Париж-2024 роҳи хешро ҳамвор кард.

Пас аз Миҷгона ва Болтаев, Баҳодур Усмонов, муштзани маъруфи дигари тоҷик дар аввалин мусобиқаи ҷаҳонии интихобии олимпӣ дар риштаи бокс, ки рӯзҳои 3-11-уми март дар шаҳри Бусто-Арсизиои Италия баргузор шуд, соҳиби роҳхат ба Олимпиадаи Париж-2024 гардид.

Баҳодур Усмонов, ки дар даври сеюми мусобиқа бар Эрисланди Алварес аз Куба дастболо шуд, дар марҳилаи чаҳорякниҳоӣ 11-уми март бо намояндаи Ҷопон Нишияма Шион рақобат кард.

Муштзани тоҷик бо қарори доварон бо ҳисоби 3:2 пирӯз шуда, роҳхати Бозиҳои Олимпии Париж-2024-ро дар вазни то 63,5 кило ба даст овард.

Пас аз роҳхати пайиҳами се муштзан билохира навбат ба навъҳои дигари варзиш ҳам расид, ки чорумин роҳхати Олимпии Париж-2024-ро Мунира Абдусаломова дар риштаи таеквандо ба номи хеш муҳр зад.

Мунира Абдусаломова роҳхати хешро аз мусобиқаи интихобии олимпӣ оид ба таеквандо дар Қораи Осиё, ки дар Ҷумҳурии Мардумии Чин баргузор гардида буд, ба даст овард.

Абдусаломова дар ин мусобиқа зери вазни 67 кг баромад намуда, дар рӯзи дуюми набардҳо бар намояндагони Имороти Муттаҳидаи Араб ва Қазоқистон пирӯз гашта, ба финал баромад ва роҳхати олимпӣ гирифт.

УМЕД АЗ ГӮШТИНГИРОН

Бино ба гузориши Федератсияи ҷудои кишвар то 10 гӯштингир ҳаққи иштирок дар Олимпиадаи имсоларо доранд. Аммо то ҳанӯз ҳеҷ ҷудокоре натавонистааст роҳи хешро ба Париж-2024 ҳамвор намояд. Дар ин росто коршиносони масоили варзишӣ ҳадс мезананд, ки барои роҳ ёфтан ба Париж-2024 байни ҷудокорони кишвар Темур Раҳимов, Эмомалии Нуралӣ, Сомон Маҳмадбеков, Беҳрӯз Хоҷазода, Комроншоҳи Устопириён, Шодмон Ризоев, Обид Ҷебов ва Меҳрзод Суфиев имконияти бештар доранд, чун нафарони болозикр дар ҳисоби хеш холҳои бештари олимпиро аз мусобиқаҳо ҷамъ овардаанд.

Барои роҳхат гирафтан ба Олимпиадаи тобистона барои ҷудокорони кишвар қаҳрамонии Осиё, ки рӯзҳои 20-22-юми апрел дар Ҳонконги Чин баргузор мегардад, фурсати хубу бамаврид аст.

Ба иттилои Федератсияи байналмилалии ҷудо (IJF), дар мусобиқаи қаҳрамонии Осиё дар Ҳонконг иштироки 274 варзишгар (166 мард ва 108 зан) аз 36 кишвар дар назар аст.

Варзишгарон барои 14 маҷмуи медалҳо (7 вазн байни мардон ва 7 вазн миёни занон) талош мекунанд.

Ба ҳайати дастаи мунтахаби Тоҷикистон 9 варзишгар (8 мард ва 1 зан) дохиланд:

Мардон: - Меҳрзод Суфиев 60 кг, Обид Ҷебов -66 кг, Беҳрӯз Хоҷазода -73 кг, Сомон Маҳмадбеков - 81 кг, Комроншоҳи Устопириён -90 кг, Шодмон Ризоев -90 кг, Ҷаҳонгир Маҷидов -100 кг, Темур Раҳимов +100 кг.

Занон: Аҳлия Муъминова -52 кг.

Зимнан, паҳлавони маъруфи тоҷик Темур Раҳимов баъди табобати тулонӣ бори аввал дар мусобиқоти имсола иштирок хоҳад кард.
Феълан ӯ дар феҳристи ҷаҳонӣ дар вазни беш аз 100 кило бо 5825 имтиёз баъди Инал Тасоеви русиягӣ (6200 имтиёз) дар ҷойи дувум ва дар феҳристи олимпӣ бо 3950 имтиёз дар ҷойи ҳафтум қарор дорад.

Варзишгарон дар ин мусобиқаи қитъавӣ имкони касби имтиёзҳои олимпиро барои дарёфти роҳхат ба Бозиҳои тобистонаи олимпии Париж-2024 доранд.

Ба иттилои Федератсияи ҷудои Тоҷикистон, дар ҳамин ҳол паҳлавонони тоҷик дар ҷамъомади муштараки таълимию тамринӣ, ки дар шаҳри Анталияи Туркия бо иштироки дастаҳои мунтахаби ҷудои тақрибан 40 кишвар ширкат карданд.

ТАЛОШИ ВАРЗИШГАРОНИ ДИГАР НАВЪҲОИ ВАРЗИШ барои РОҲХАТИ ОЛИМПӢ

Варзишгарони тоҷик муборизаро барои дарёфти роҳхатҳои дигари олимпӣ дар мусобиқоти зерини интихобии ҷаҳонию қитъавӣ идома хоҳанд дод:

Шамшерзанӣ. Аз рӯи натоиҷи феҳристи 1-уми апрел. Инчунин 27-28-уми апрел. Дубай (Имороти Муттаҳидаи Арабӣ) - мусобиқоти қораи Осиё.

Гӯштини озод ва юнонию румӣ. 19-21-уми апрел. Бишкек (Қирғизистон) – мусобиқоти қораи Осиё ва 9-12-уми май. Истамбул (Туркия) - мусобиқоти ҷаҳонӣ.

Вазнбардорӣ. Аз рӯи натоиҷи феҳристи 28-уми апрел.

Бокс. 23-юми май – 3-юми июн. Бангкок (Тайланд) - мусобиқоти ҷаҳонӣ.

Ҷудо. Аз рӯи феҳристи 23-юми июн.

Ёдовар мешавем, дар Олимпиадаи Токио-2020 ҳамаи даҳ варзишгари тоҷик - Баҳодур Усмонов, Шаббос Неъматуллоев, Сиёвуш Зуҳуров (ҳарсе дар риштаи бокс), Сомон Маҳмадбеков, Акмал Муродов, Комроншоҳи Устопириён, Темур Раҳимов (ҳарчор дар риштаи ҷудо), Анастасия Тюрина, Олимҷон Ишонов (ҳарду дар шиноварӣ) ва Илдар Аҳмадиев (варзиши сабук) ноком шуда, бе медал монданд.

Зимнан, варзишгарони тоҷик дар Бозиҳои тобистонаи олимпӣ дар ҳайати дастаи мунтахаби Тоҷикистони соҳибистиқлол аз соли 1996 ширкат меварзанд. Мунтахаби кишвар дар Бозиҳои олимпӣ ҳамагӣ чаҳор медал (1 тилло, 1 нуқра ва 2 биринҷӣ) ба даст овардааст.

Яҳё МАҲМАДНАБИЕВ, “ҶТ”

Эзоҳи худро нависед



Рамзҳо дар расм