Имрӯз дар маркази маъмурӣ, фарҳангӣ ва сайёҳии ВМКБ, шаҳри Хоруғ бахшида ба Рӯзи Модар чорабинии бошукӯҳи идона баргузор гардид.

Раиси ВМКБ Мирзонабот Алишер Худобердӣ дар қисмати расмии намоиши идона, ки дар толори Театри мусиқию мазҳакавии ба номи М. Назаров доир шуд, модарону бонувонро табрику таҳният гуфт.

Гуфта шуд, ки маҳз бо шарофати соҳибистиқлолии кишварамон, таҳти сиёсати модарпарваронаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, Ҷаноби Олӣ муҳтарам Эмомалӣ Раҳмон, имконияти мусоид ба вуҷуд омад, то мақому манзалати бонувон дар мамлакати мо ба сатҳи баланд бароварда шавад. Имрӯз бонуи тоҷик соҳиби ҳуқуқҳое мебошад, ки дар баъзе давлатҳои ҷаҳон, занону духтарон дар орзуи онҳо мебошанд.

Иштироки бонуи тоҷик, дар 35 соли соҳибистиқлолӣ дар ҳамаи соҳаҳои хоҷагии халқи мамлакат вусъати бесобиқа пайдо намуда, айни ҳол, намояндагони ин қишри бонуфузи ҷамъият дар арсаи сиёсату давлатдорӣ, дипломатия, қонунгузорӣ, ҳифзи ҳуқуқ, тиҷорат, иқтисоду молия, фарҳангу маориф ва тандурустӣ аз бист то ҳаштод фисади кормандонро ташкил медиҳанд. Ба замми ин, занони қавиирода ва пурҷасорати тоҷик дар ҷодаи таъмини мудофиавии давлат ва амнияти миллӣ низ содиқона ифои вазифа намуда, дар навъҳои гуногуни варзиш шарафу эътибори Тоҷикистонро бо ғолибиятҳои худ боло мебардоранд.
Пешвои миллатамон борҳо ба заҳмату фидокориҳои занони тоҷик баҳои баланд дода, иброз медоранд, ки: “Ман нақши модарону бонувони тоҷикро аз оғози фаъолияти сиёсии худ то имрӯз бениҳоят баланд арзёбӣ менамоям. Зеро онҳо аз рӯзҳои аввал сиёсати пешгирифтаи Роҳбари давлатро дар барқарорсозии сулҳ, сарҷамъ намудани мардуми тоҷик, ҳифзи истиқлолу озодӣ ва дигар масъалаҳои давлатдорӣ на фақат самимона дастгирӣ намуданд, балки барои амалӣ гардидани ҳадафҳои давлати тозаистиқлоли тоҷикон кумак ва саъю талошҳои зиёд карданд”.

Зикр шуд, ки саҳми занон дар дигар соҳаҳои гуногуни хоҷагии халқи вилоят назаррас буда, ин рақам дар соҳаҳои маориф 3376 нафар, тандурустӣ 3350 нафар ва фарҳанг 693 нафар бонуро ташкил медиҳад. Аз нисф зиёди соҳибкорони вилоят бонувон буда, дар соҳаи бонкдорӣ бошад, ин нишондиҳанда ба 51 фоиз баробар гардид. Барои дастгирии соҳибкорзанон ва занони ҳунарманд, аз ҷониби бонку ташкилотҳои қарздиҳӣ, солҳои охир ҳаҷми қарзҳо, аз он ҷумла дарозмуддату афзалиятнок бамаротиб афзуда, теъдоди гирандагони Гранти Президентӣ дар соли 2025 ба 18 нафар расид.

- Боварии комил дорем, ки бонувони бадахшонӣ дар қатори тамоми бонувони тоҷик минбаъд низ дар заминаи донишу таҷриба, ҳунару истеъдод, кӯшишу ғайрат, қобилияти ташкилотчигӣ ва маҳорату кордонии хеш дар татбиқи сиёсати Ҳукумати Ҷумҳурии Тоҷикистон, минҷумла, сиёсати хирадмандонаи Пешвои оқилу дурандеши миллат, Ҷаноби Олӣ муҳтарам Эмомалӣ Раҳмон дар пешрафт, ободӣ ва гугулшукуфоии Ватани маҳбубамон саҳми боз ҳам бештар мегузоранд,-иброз дошт раиси вилоят.

Сипас, як зумра бонувони фаъол ва собиқадорони соҳаҳои гуногун бо ифтихорнома, сипоснома ва туҳфаҳои хотиравӣ қадр гардида, барномаи фарҳангӣ бо иштироки беҳтарин санъаткорон манзури ҳозирин карда шуд.

Садоншо ҶАНОБИЛШОЕВ, “ҶТ