ҶОМЕА
Шанбе 22 Июн 2024 11:13
10132
ВМКБ чун анъана нақшаи даъвати баҳории ҷавонписарон ба сафи Қувваҳои Мусаллаҳи Ҷумҳурии Тоҷикистонро аз аввалинҳо шуда, 100 фоиз иҷро намуд.

Чорабинии мутантан ба ифтихори гусели навдаъватшудагон субҳи имрӯз, 1 апрели соли равон бо баргузории роҳпаймоии оммавӣ дар маркази маъмурию фарҳангии ВМКБ – шаҳри Хоруғ оғоз гардид.

Дар он зиёда аз 5 ҳазор нафар, аз ҷумла роҳбарияти вилоят, шаҳр ва дигар ноҳияҳо, масъулини идораю муассисаҳо, сарбозон, кормандони сохторҳои қудратӣ, мақомотҳои ҳифзи ҳуқуқ, наваскарону волидони онҳо ва ҷавонони вилоят бо шиору овезаҳои ватандӯстона ва Парчами давлатӣ дар даст иштирок намуданд.

Нахуст, Мирзонабот Алишер Худобердӣ, раиси вилоят ҳозиринро ба муносибати анҷоми маъракаи даъвати баҳорӣ табрику таҳният намуда, зикр кард, ки тайи шаш соли охир ҷавонони шарафманди ВМКБ бо дарки амиқи рисолати хизмат ба халқу Ватан, ҳифзи якпорчагию ягонагии давлат, ба ҷо овардани қарзи муқаддаси шаҳрвандӣ ва ҳимояи арзишҳои волои миллӣ, нақшаи даъвати ҷавонписарон ба сафи Қувваҳои Мусаллаҳро дар рӯзи аввали маъракаи даъват сарбаландона иҷро менамоянд.

Таъкид гардид, ки хизмат дар сафи Қувваҳои Мусаллаҳ нишонаи олии садоқат ба Модар-Ватан буда, ҳар як ҷавонмард дар ҳаёти худ бояд аз ин мактаби мардонагӣ гузашта, дарси ватандӯстию ҷасоратро аз худ намояд.

Гуфта шуд, ки бо мусоид гардидани шароити хуби хизмат дар қисмҳои низомӣ, аксарияти ҷавонон имрӯз ба таври худихтиёрӣ ба комиссариатҳои ҳарбӣ ҳозир гардида, барои адои қарзи шаҳрвандии худ изҳори омодагӣ менамоянд. Дар маъракаи даъвати навбатӣ бо дарки баланди масъулияти шаҳрвандӣ зиёда аз 80 фисади даъватшудагони вилоят, ки дар хориҷи кишвар, аз ҷумла Федератсияи Русия, Қирғизистон, Олмон, Руминия ва дигар давлатҳо қарор доштанд, бо гирифтани даъватнома ба Ватан баргашта, имрӯз бо сари баланд ба хизмати Модар-Ватан раҳсипор гардиданд.

Зимни ҷамъомад ба бархе аз навдаъватшудагон, ки дар Ташкилоти ҷамъиятии мададгори мудофиа курси ронандагӣ гузашта буданд, шаҳодатномаи ронандагӣ тақдим карда шуд.

Дар идома навдаъватшудагон ва волидайни онҳо баромад намуданд. Инчунин, тарбиятгирандагони муассисаҳои томактабӣ дар мавзӯъҳои Ватан-Модар порчаҳои шеърӣ қироат карданд.

Сипас, аз ҷониби аҳли фарҳанги вилоят барномаи фарҳангӣ пешниҳоди ҳозирин гардонида шуда, навдаъватшудагон зери шиори “Тоҷикистон ба пеш” ба хизмати ҳарбӣ гусел карда шуданд.

Садоншо ҶАНОБИЛШОЕВ, “ҶТ”

Эзоҳи худро нависед



Рамзҳо дар расм