Муассисаи томактабии "Саволу ҷавоб"-и шаҳри Душанбе, ки чанде пеш бар асари беэътиноии кормандони он як тифли дусола фавтида буд, феълан фаъолият намекунад.

Дар ин бора вазири маориф ва илми Тоҷикистон Раҳим Саидзода 28 июл зимни нишасти хабарӣ иттилоъ дод.

Ӯ гуфт ки ин муассиса хусусӣ аст ва барои фаъолият аз Агентии назорат дар соҳаи маориф иҷозатнома гирифтааст.

- Аммо чанд вақт қабл аз ин фоҷеа муҳлати иҷозатномаи ин муассиса ба анҷом расида буд, - гуфт вазир.

Ҳамчунин гуфта шуд, ки корҳои санҷишӣ ба анҷом расидааст ва натиҷаҳо ба суд пешниҳод гардидааст.

Ёдовар мешавем, ки ҳодисаи фавти кӯдаки 2 сола дар кӯдакистони "Саволу ҷавоб" моҳи май ба амал омада, мавҷи нигарониҳои ҷомеаро ба миён овард.

Сайёраи ҚИЁМИДДИН, “ҶТ”