Имрӯз зимни нишасти матбуотӣ Баҳодур Давлатзода, ректори Консерваторияи миллии Тоҷикистон ба номи Талабхӯҷа Сатторов иттилоъ дод, ки имсол дар даври ноҳиявии Озмуни ҷумҳуриявии “Тоҷикистон – Ватани азизи ман” 71 нафар донишҷӯён, магистрантон ва шунавандагони курсҳои омӯзишии Консерватория иштирок намуда, 54 нафари онҳо ба даври дуюми озмун роҳхат гирифтанд.

Ба гуфтаи ӯ, аз роҳхатгирандагон 6 нафар дар номинатсияи композиторӣ, 26 нафар дар номинатсияи навозандагӣ ва 22 нафар дар номинатсияи сарояндагӣ мебошанд. Теъдоди иштирокчиёни озмун нисбат ба соли гузашта 11 нафар зиёд шуда, 18 фоиз афзоиш ёфтааст.

Зикр гардид, ки донишҷӯёни Консерватория соли ҳаштум аст дар Озмуни ҷумҳуриявии “Тоҷикистон – Ватани азизи ман”, ки бо сарпарастии Президенти Ҷумҳурии Тоҷикистон муҳтарам Эмомалӣ Раҳмон таъсис ёфтааст, фаъолона иштирок менамоянд.

Ҳамчунин, ректори Консерватория хабар дод, ки яке аз самтҳои муҳими фаъолияти таълимии муассиса баргузории консертҳои синфии омӯзгорон мебошад. Дар давраи ҳисоботӣ 68 нафар омӯзгор консертҳои синфии худро баргузор намуданд, ки нисбат ба ҳамин давраи соли гузашта 18 консерт ё 36 фоиз зиёд мебошад.

Гулафшон КАРИМОВА, “ҶТ”