Ба реҷаи таътили хонандагони муассисаҳои таҳсилоти миёнаи умумӣ тағйирот ворид карда шуд. Мувофиқи ин тағйирот, аз ин пас хонандагон дар таътили дарпешистодаи тирамоҳӣ, ки баъди ҷамъбасти чоряки якум (31 октябр) оғоз мешавад, ба ҷойи 10 рӯз 7 рӯз истироҳат мекунанд. Ҳамчунин, таътили зимистона як ҳафта ва баҳорӣ 5 рӯз муайян карда шудааст. Дар ин хусус аз Вазорати маориф ва илми Ҷумҳурии Тоҷикистон ба рӯзномаи “Ҷавонони Тоҷикистон” хабар доданд.

Зимнан, давомнокии соли хониши 2024-2025 бе назардошти аттестатсияи ҷамъбастӣ 35 ҳафта ва барои хонандагони синфи якум 34 ҳафтаро дар бар мегирад. Гуфта мешавад, ки ин ҳолат дар асоси тағйиру илова ворид намудан аз 28 марти соли 2024, №187 ба Қарори Ҳукумати Ҷумҳурии Тоҷикистон (аз 1 июни соли 2016, №237) мебошад.

Таътилҳои соли хониш ба рӯзҳои мазкур рост меоянд: таътили тирамоҳӣ - 7 рӯз (аз 1-уми ноябр то 7-уми ноябр); таътили зимистона - 7 рӯз (аз 1-уми январ то 7-уми январ); таътили баҳорӣ - 5 рӯз (аз 25 то 29-уми март).

Маврид ба ёдоварист, ки қаблан, хонандагони муассисаҳои таҳсилоти миёнаи кишвар аз 1 то 10-уми ноябр ба таътили тирамоҳӣ, аз 1 то 10-уми январ ба таътили зимистона ва аз 21 то 31-уми март ба таътили баҳорӣ мебаромаданд.

Ҷасури ҚИЁМИДДИН, “ҶТ”