Дар нимсолаи якуми соли 2026 аз ҷониби шуъбаи низоми менеҷменти сифат ва бахшҳои минтақавии Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон “Тоҷикстандарт” дар 104 корхонаи ватанӣ низоми менеҷменти сифат ҷорӣ гардида, корҳои сертификатсионӣ анҷом дода шуданд.

Дар ин бора зимни нишасти матбуотии “Тоҷикстандарт” иттилоъ дода шуд.

Ҳамчунин, зикр гардид, ки дар ин давра нозироти савдои пахтаи Агентӣ бо мақсади татбиқи қонунгузории Ҷумҳурии Тоҷикистон дар соҳаи баҳодиҳии мутобиқат ва ҳифзи ҳуқуқи истеъмолкунандагон, инчунин, иҷрои дастуру супоришҳои Ҳукумати Ҷумҳурии Тоҷикистон корҳои сертификатсиониро нисбат ба 51 ҳазору 604,2 тонна нахи пахта, 9 ҳазору 670,9 тонна ресмони дурушти пахтагӣ, 1 ҳазору 163,5 тонна матои пахтагин, 26,5 тонна маҳсулоти трикотажӣ, 40,2 тонна пахтаи дӯзандагӣ ва мебелӣ, 16,1 тонна пилла ва партовҳои он, инчунин 58 ҳазору 938,8 тонна дигар маҳсулот ба анҷом расонидааст.

Таъкид шуд, ки дар маҷмӯъ дар шашмоҳаи аввали соли ҷорӣ 121 ҳазору 460,2 тонна маҳсулот аз ташхиси сертификатсионӣ гузаронида шудааст. Ин нишондиҳанда нисбат ба ҳамин давраи соли 2024, 120,5 фоиз ва дар муқоиса бо нимсолаи якуми соли 2025, 138,6 фоизро ташкил медиҳад.

М. МУҚАДДАМОВА, “ҶТ”