Тоҷикону қирғизони ноҳияи Мурғоби Вилояти Мухтори Кӯҳистони Бадахшон Наврӯзи оламафрӯзро дар Майдони муқаддасоти миллӣ бо расму оинҳои аҷдодӣ қайд карданд.

Дар ибтидо ҳайати расмӣ аз намоишгоҳи аҳли заҳмати ноҳия, ки фарҳанги ду халқи ба ҳам дӯсту бародар - тоҷикону қирғизонро ифода мекард, дидан намуданд.

Сипас, ҳозиринро раиси ВМКБ Мирзонабот Алишер Худобердӣ ва намояндаи Ҳукумати Ҷумҳурии Тоҷикистон, муовини раиси Кумитаи ҳифзи муҳити зисти назди Ҳукумати Ҷумҳурии Тоҷикистон Раҳмонзода Лоиқ таҳният гуфтанд.

Раиси вилоят Мирзонабот Алишер Худобердӣ сокинони ноҳияро ба муносибати Наврӯзи оламафрӯз табрик намуда, зикр кард, ки ҷашни Наврӯз яке аз пуршукӯҳтарин оинҳои ниёгонамон буда, бо фарорасии худ аз омадани фасли баҳор ва оғози соли нави аҷдодӣ мужда медиҳад.

Гуфта шуд, ки Наврӯзи ноҳияи Мурғоб хусусият ва умимиятҳои худро доро мебошад, зеро дар ин гӯшаи зебои Ватани азизамон имрӯзҳо тоҷикону қирғизон дар фазои ваҳдату ҳамгироии иҷтимоӣ умр ба сар бурда, анъанаҳои неку ҷовидонаи наврӯзии ду халқи ба ҳам дӯстро ба таври шоиста муаррифӣ менамоянд.

Дар идома ҳунармандони ноҳия бо суруду таронаҳои дилошӯб хотири ҳозиринро шод гардонданд.

Садоншо ҶАНОБИЛШОЕВ, “ҶТ”