Бахшида ба Рӯзи матбуоти тоҷик санаи 10-уми март бо ташаббуси кафедраи матбуоти факултети журналистикаи Донишгоҳи миллии Тоҷикистон, Иттифоқи журналистони Тоҷикистон ва Шӯрои ВАО-и Ҷумҳурии Тоҷикистон дар толори маҷлисгоҳи шаҳраки донишҷӯён ҳамоиш дар мавзӯи “Матбуоти даврӣ: мушкилот ва дурнамо” баргузор гардид.

Қобилҷон Хушвахтзода, ректори Донишгоҳи миллии Тоҷикистон зимни сухани ифтитоҳии худ ҳозирин ва кулли қаламкашону кормандони ВАО-ро бахшида ба Рӯзи матбуот шодбош гуфта, таъкид намуд, ки маҳз хизмати шоён ва саҳми арзандаи устодони факултети журналистикаи Донишгоҳи миллии Тоҷикистон аст, ки дар саргаҳи ин ҳама пешрафту комёбиҳои воситаҳои ахбори оммаи ватанӣ қарор дорад.

Номбурда аз суханони Пешвои муаззами миллат иқтибос оварда, қайд намуд, ки: “Воситаҳои ахбори омма ба сифати дастгоҳи тавоно дар муборизаи таҳмилии иттилоотӣ чун сипари боэътимоди халқу давлат хизмат менамоянд, ба ҳифзи оромиву суботи ҷомеа фаъолона мусоидат мекунанд ва эътимоди мардумро ба фардои нек таҳким мебахшанд”.

Сипас муовини вазири фарҳанги ҷумҳурӣ Абдураҳимзода Қурбоналӣ Бозор, мушовири Кумитаи Маҷлиси Намояндагони Маҷлиси Олиии Ҷумҳурии Тоҷикистон оид ба корҳои байналмилалӣ, иттиҳодияҳои ҷамъиятӣ ва иттилоот Шарифзода Шоҳон, директори муассисаи давлатии “Академияи воситаҳои ахбори оммаи Тоҷикистон” С. Исматзода ва директори маркази тадқиқоти журналистӣ Хуршеди Атовулло ҳозиринро бахшида ба Рӯзи матбуот табрик намуданд.

Баъд аз анҷоми ҳамоиш меҳмонон ва аҳли толор аз осорхонаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки ба тозагӣ дар шаҳраки донишҷӯён ифтитоҳ гардид, дидан намуданд.

Қ. МАҲМАДҶОНОВ, “ҶТ”