Бахшида ба Рӯзи кинои тоҷик, ки ҳамасола 16 октябр дар Тоҷикистон таҷлил мегардад, дар Театри вилоятии ба номи Ато Муҳаммадҷонови шаҳри Бохтар чорабинии бошукӯҳи идона доир гардид.

Дар чорабинӣ муовини раиси вилояти Хатлон Махфират Хидирзода, директори муассисаи давлатии “Тоҷикфилм” Раҳмон Носир, собиқадорони соҳаи синамо ва синамогарони хориҷӣ аз Қирғизистон, Ӯзбекистон ва Эрон иштироку суханронӣ намуданд.

Ҳамоишро муовини раиси вилоят Махфират Хидирзода ҳусни оғоз бахшида, аҳли ҳунар ва ҳозиринро бо 90-солагии кинои тоҷик шодбош гуфт.

- Дар замони соҳибистиқлолии кишвар Ҳукумати мамлакат ба ин соҳаи ҳаётан муҳими ҷомеа диққати махсус медиҳад. Қабул гардидани Барномаи давлатии рушди кинои тоҷик барои солҳои 2018-2022 далели ин гуфтаҳост маҳз синамо муаррифгари ҳар як миллату давлат буда, тавассути он давраҳои гуногуни сарнавишти халқҳо, зиндагию рӯзгори онҳо инъикос мегардад - зикр намуд М. Хидирзода.

Гуфта шуд, ки бо мақсади татбиқи Барномаи рушди кинои тоҷик барои то соли 2022 дар вилоят як қатор корҳо ба анҷом расидаанд, ки таъсиси муассисаи давлатии вилоятии “Хатлонсинамо” аз ҷумлаи онҳост.

Зимни ироаи сухани табрикии худ роҳбари “Тоҷикфилм” Раҳмон Носир аз мақомоти иҷроияи ҳокимияти давлатии вилояти Хатлон барои дастгирии доимии синамогарони тоҷик, фароҳам овардани шароити мусоид ҷиҳати рушди кино изҳори сипос намуд.

Дар ҷараёни ҳамоиш аз ҷониби муовини раиси вилоят Махфират Хидирзода ба як қатор кормандони Раёсати “Тоҷикфилм” дар вилоят ва муассисаи давлатии вилоятии “Хатлонсинамо” дар вазъияти тантанавӣ ифтихорномаи мақомоти иҷрояи ҳокимияти давлатии вилояти Хатлонро тақдим намуд.

Пас аз қисмати тантанавии чорабинӣ филми истеҳсоли муассисаи давлатии “Хатлонсинамо” бо номи “Саҳв” манзури иштирокчиён шуд.