Имрӯз дар Донишкадаи тарбияи ҷисмонии Тоҷикистон ба номи Саидмумин Раҳимов бахшида ба 33-юмин солгарди таъсисёбии Қувваҳои Мусаллаҳи Ҷумҳурии Тоҷикистон чорабинии тантанавӣ баргузор гардид.

Тибқи иттилоъ, дар чорабинии мазкур раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Гулаҳмадзода Зулфиқор Аҳмад, муовини вазири мудофиаи Ҷумҳурии Тоҷикистон Музафарзода Бахтиёр, ҳайати роҳбарияти донишкада, намояндагони мақомоти давлатӣ, омӯзгорону донишҷӯён ва доираи васеи ҷавонон иштирок намуданд.

Зимни суханрониҳо зикр гардид, ки Қувваҳои Мусаллаҳи Ҷумҳурии Тоҷикистон ҳамчун рукни муҳими давлатдорӣ дар ҳифзи дастовардҳои Истиқлоли давлатӣ, таъмини амнияти миллӣ, суботи сиёсӣ ва тамомияти арзии кишвар нақши калидӣ дорад. Ҳамзамон таъкид шуд, ки тарбияи насли ҷавон дар руҳияи баланди ватандӯстӣ, садоқат ба Ватан, эҳтиром ба арзишҳои миллӣ ва омодагӣ ба ҳимояи марзу буми кишвар аз самтҳои афзалиятноки сиёсати давлатии ҷавонон ба ҳисоб меравад.

Дар фарҷоми чорабинӣ барномаи фарҳангӣ-ватандӯстона пешкаши ҳозирин гардида, ба як қатор хизматчиёни ҳарбӣ, варзишгарон ва ҷавонони фаъол барои саҳми арзанда дар таҳкими тарбияи ҳарбӣ-ватандӯстӣ, рушди соҳаи варзиш ва тарғиби арзишҳои миллӣ сипоснома ва туҳфаҳо тақдим карда шуд.

“ҶТ”