Дар рӯзи дуюми Чемпионати Осиё оид ба ҷудо дар соли 2026 дар шаҳри Ордоси Ҷумҳурии Мардумии Чин ҷудокори дигари тоҷик Сомон Маҳмадбеков дар вазни то 81 кг ба гирифтани медали нуқра мушарраф шуд.

Ӯ дар даври аввал озод буд, дар даври дуюм Шинебайар Оюнчимеги муғулро шикаст дода, дар даври чаҳорякниҳоӣ бар Гаджидовуд Гасанови баҳрайнӣ ғолиб омад. Дар қисмати нимниҳоӣ Сомон ғалабаро бар намояндаи АМА- Гаджимурод Умаров ба даст оварда, дар финал аз Адилет Алмати қазоқ мағлуб шуд ва соҳиби нишони нуқра гардид.

Инчунин, имрӯз ҷудокори дигари тоҷик Беҳрӯз Хоҷазода мақоми панҷумро дар вазни то 81 кг ишғол намуд. Беҳрӯз дар даври аввал Ли Квок Винг аз Ҳонконгро мағлуб карда, дар даври чаҳорякниҳоӣ бар Муродҷон Юлдошеви узбек ғалаба кард. Дар қисмати нимниҳоӣ аз ҷудокори қазоқ Алмат Адилет мағлуб шуда, дар рақобат барои медали биринҷӣ аз Гаджидовуд Гасанови баҳрайнӣ мувоҷеҳи шикаст шуд ва мақоми панҷумро соҳиб гашт.

Ҷудокори дигари тоҷик Абдуллои Ориф мақоми панҷумро дар вазни то 73 кг касб намуд. Абдулло рақобатро дар даври дуюм оғоз карда, ғалабаро бар намояндаи Макао - Чен Ҳаоженг ба даст оварда, дар марҳилаи чаҳорякниҳоӣ аз намояндаи Кореяи Ҷанубӣ - Эункюл Ли шикаст хӯрд ва ба марҳилаи тасаллобахш рафт. Дар марҳилаи тасаллобахш, Абдулло бар Но Сок Борм аз Кореяи Шимолӣ ғолиб омада, дар мубориза барои нишони биринҷӣ аз намояндаи АМА - Казбек Нагучев шикаст хӯрд ва мақоми панҷумро ишғол намуд.

Дар идома, ҷудокорбонуи тоҷик Александра Кан дар вазни 57 кг дар рақобати аввал аз Нан Ванги мизбон мувоҷеҳи шикаст шуда, аз идомаи рақобатҳо бенасиб монд.

“ҶТ”