Шоми 22-юми июл дар Қасри теннис ва маҷмааи варзишҳои обии шаҳри Душанбе Мусобиқаи муштзанҳои касбӣ бо номи “Шоми бокс” бо як шукӯҳу шаҳомат баргузор гардид.

Дар ин мусобиқа ҳамчун меҳмони фахрӣ Раиси Маҷлиси миллии Маҷлиси Олии Ҷумҳурии Тоҷикистон, раиси шаҳри Душанбе муҳтарам Рустами Эмомалӣ ширкат кард. Ҳамчунин, Умар Крилёв, президенти Ассотсиатсияи байналмилалии бокс , Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Комил Мирзоалиев раиси Федератсияи бокси Тоҷикистон ва дигар масъулин ширкат доштанд.

Дар ин мусобиқа варзишгарони кишвар маҳорати олӣ нишон дода, соҳиби чандин камарбанд гардиданд.

Дар набарди асосии “Шоми бокс” дар Душанбе (“Winline. IBA.PRO 8”) муштзани маъруфи тоҷик Баҳодур Усмонов бо намояндаи Камерун Кристофер Муафо рақобат намуд.

Қаҳрамони Осиё дар соли 2019 ва соҳиби медали биринҷии қаҳрамонии ҷаҳон дар соли 2023 Баҳодур Усмонов муқобили рақибаш 10 раунд мубориза бурда, бо қарори якдилонаи доварон ғолиб дониста шуд ва унвони қаҳрамони IBA.PRO Intercontinental дар вазни сабукро дифоъ кард.

Муштзани ҳаваскор ва касбии тоҷик Баҳодур Усмонови 27-сола дар вазнҳои сабук ва якуми миёна рақобат мекунад. Вай дар бокси ҳирфаӣ ҳамакнун 11 ғалаба ба даст оварда, то ҳоло мағлуб нашудааст.

Ёдовар мешавем, Усмонов дар охирин қувваозмоии худ моҳи майи соли равон дар Душанбе Алберт Пагараи филиппиниро барои дарёфти камарбанди қаҳрамонии WBA Gold дар раунди сеюм бо нокаути техникӣ ё фаннӣ шикаст дода, унвонҳои IBA.PRO Intercontinental ва WBA Gold-ро дар вазни сабук соҳиб шуда буд.

Кристофер Муафои 29-сола бошад, моҳи сентябри соли гузашта камарбанди WBO Global-ро ба даст овардааст. Вай дар бокси ҳирфаӣ дар маҷмуъ 12 рақобат анҷом дода, дар 11-тоаш пирӯз гаштааст.

Ҳамчунин, дар “Шоми бокс” дар Душанбе ҷоизадори Бозиҳои олимпии соли 2024 ва қаҳрамони Бозиҳои 19-уми осиёӣ Давлат Болтаев аз Тоҷикистон барои унвони IBA.PRO Intercontinental бо муштзани Нигерия - Соломон Адебайо дар набарди 8-раунда рақобат намуд. Рақобати Болтаев ва Соломон дар дақақаҳои аввали рақобат бо нокаути фаннӣ ба фоидаи муштзани тоҷик хотима ёфт. Пас аз мағлуб намудани рақиби хеш Болтаев дар суханрониаш иброз дошт, ки: “Ман боварӣ доштам, ки рақибам то пайти панҷум муқобили ман мубориза бурда наметавонад, аммо вақте дидам, ки раиси шаҳри Душанбе муҳтарам Рустами Эмомалӣ баҳри дастгирии мо омадаанд, барои болида гардидани хотири эшон корро дар пайти аввал тамом кардам.

Бояд гуфт, ки рақиби Болтаев, Адебайо дар бокси ҳирфаӣ то ин замон 14 рақобат карда, дар ҳамааш ғолиб гардида буд ва танҳо муштзани тоҷик тавонист ӯро шикаст диҳад.

Гуфтан зарур аст, ки моҳи майи имсол Давлат Болтаев дар “Шоми бокс” дар Душанбе бо Закари-Серж Мвого Амугу аз Камерун дар вазни сангин (+90,7 кг) рақобат карда буд. Қувваозмоӣ дар раунди дуюм бо пирӯзии муштзани 26-солаи тоҷик бо нокаути фаннӣ хотима ёфт. Болтаев соҳиби камарбанди IBA.Pro гардид. Вай дар ҳамаи ҳафт рақобаташ дар бокси касбӣ дастболо шудааст.

Ҳамчунин, дар рақобатҳои асоси “Шоми бокс” барномаи ба даст овардани камарбанди “IBA.PRO 8” финалисти мусобиқоти қаҳрамонии ҷаҳон-2021 аз Русия Вадим Мусоев (13-0-0) барои камарбанди IBA.PRO Intercontinental дар вазни то 67 кило бо муштзани Мексика Хосе Мигел Боррего (22–5-0) мубориза бурданд.

Рақобати Вадим ва Хосе яке аз аз рақобатҳои ҷолиби дидор буд, ки тамоми 10 пайт идома кард ва ғолибро доваран муайян намуданд. Дар ин рақобати бисёр тезу тунд бо қарори якдилонаи доварон ғолибият насиби варзишгари рус Вадим Мусоев гардида, шумораи пирӯзиҳояш дар бокси касбӣ 13-0-0 баробар гардид. Ҳамчунин Вадим Мусоев дар ин шом соҳиби камарбанди IBA.PRO Intercontinental гардид.

Ҳамчунин, дар ин шом Акмал Убайдов (8-0) бо қарори якдилонаи доварон бар Тайфур Алийев (3-1), Некрӯз Салимов (2-0) бо қарори якдилонаи доварон бар Абдулазиз Абдупаттаев (3-1) ғалаба карда, намояндаи дигари Тоҷикистон, Дамир Муйбалихонов дар рақобати аввали бокси касбӣ бо Гиорги Капанадзе аз Гурҷистон мусовӣ намуд.

Яҳё МАҲМАДНАБИЕВ, “ҶТ”