Дар Ҷамоати деҳоти Дӯстии ноҳияи Абдураҳмони Ҷомӣ бозии футбол байни дастаҳои деҳаи Навбаҳори ин ноҳия ва деҳаи Охҷари ноҳияи Ёвон баргузор гардид.

Дар ин бора аз Раёсати кор бо ҷавонон ва варзиши вилояти Хатлон хабар доданд.

Қабл аз оғози бозӣ Рамазон Насриддинзода, сардори Раёсати кор бо ҷавонон ва варзиши вилояти Хатлон иброз доштааст, ки фароҳам овардани чунин шароити созгор имкон медиҳад, то ҷавонон аз ҳар гуна ҳизбу ҳаракатҳои тундгаро дур гардида, тарзи ҳаёти солимро пеша кунанд.


Масъулини ҷамоати деҳоти Дӯстии ноҳияи Абдураҳмони Ҷомӣ вобаста ба дастгириҳои давлату Ҳукумати кишвар ва рушди соҳа ёдовар гардида, аз фазои орому осоишта шукргузорӣ намуданд.

Бояд гуфт, ки мақсад аз баргузории чунин мусобиқаҳо рушди бемайлони соҳаи варзиш, ҷалби наврасону ҷавонон ва дигар табақаи ҷомеа ба варзиш ва таъмини оммавияти он дар шаҳру навоҳии кишвар ба ҳисоб меравад.