Раиси вилояти Хатлон Давлаталӣ Саид бо сафири фавқулодда ва мухтори Туркманистон дар Ҷумҳурии Тоҷикистон Кочмурадов Аймурад дидору мулоқот намуда, муносибатҳои фарҳангиву иқтисодиро баррасӣ намуданд.

Дар ин бора Маркази матбуоти раиси вилояти Хатлон иттилоъ дода, зикр менамояд, ки зимни мулоқот ба муштаракоти фарҳангию равобити дерини дӯстонаи Тоҷикистону Туркманистон таъкид шуда, қайд гардид, ки ин ҳамкориҳои иқтисодию фарҳангӣ сол аз сол вусъат меёбанд.

Ба таъкиди Давлаталӣ Саид, бо мақсади баланд бардоштани сатҳи ҳамкориҳо дар соҳаи фарҳанг, гуманитарӣ, мубодилаи гурӯҳҳои эҷодӣ, иштироки мутақобил дар фестивалҳо, симпозиумҳо ва дигар чорабиниҳо ба анъанаи нек табдил ёфтааст.

- Масъулияти баландро барои ҳифзи риштаҳои дарозмуддати дӯстӣ дарк намуда, итминон дорем, ки ҳамкориҳо дар бахшҳои тиҷорат, иқтисод, фарҳанг, сармоягузорӣ мусоидат мекунад,-иброз дошт раиси вилояти Хатлон.

Бояд зикр намуд, ки муассисаи таҳсилоти миёнаи умумии №8 барои 540 ҷой нишаст дар деҳаи Ғаллаободи ҷамоати деҳоти Ҷиликӯли ноҳияи Дӯстӣ дар доираи ҳамкориҳои мутақобилан судманд ва гуногунҷанбаи Ҷумҳурии Тоҷикистон бо Туркманистон ба нақша гирифта шуда, аз ҷониби Туркманистон сохта ба истифода дода мешавад.

Бинои муассисаи мазкур аз ду ошёна иборат буда, дар назар аст, ки бо истифода аз шароитҳои муосири илмомӯзӣ ва муҷҷаҳаз бо синфхонаҳои барҳаво мавриди баҳрабардорӣ қарор дода шавад.

Фармоишгари сохтмон сафоратхонаи давлати Туркманистон дар Ҷумҳурии Тоҷикистон буда, пудратчии асосии сохтмон Ҷамъияти хоҷагидории “Довлет Гурлушык”-и давлати Туркманистон мебошад. Корҳои сохтмонӣ аз 21 июни соли 2023 шуруъ шуда, лоиҳакаши бино ООО “Хатлонлоиҳасоз” мебошад.