Соли 2026 дар Тоҷикистон шумораи бекоршавии ақди никоҳ кам шудааст. Дар ин хусус имрӯз - 15 июл Бунафша Файзиддинзода, раиси Кумитаи кор бо занон ва оилаи назди Ҳукумати Ҷумҳурии Тоҷикистон зимни нишасти матбуотӣ иттилоъ дод.

Ба қавли раиси Кумита дар шашмоҳаи аввали соли равон бақайдгирии давлатии бекор кардани ақди никоҳ 3 ҳазору 526 ҳолатро ташкил додааст, ки нисбати ҳамин давраи соли гузашта 591 ҳолат кам аст.

Дар ин давра теъдоди кӯдакони ноболиғ, ки баъди бекор кардани ақди никоҳ бо яке аз волидон мондаанд 3 ҳазору 111 нафарро ташкил медиҳанд, ки нисбати 6 моҳи соли 2025 (3632 нафар) 521 нафар кам мебошад.

Ҳамчунин, гуфта шуд, ки бо мақсади пешгирии ин раванд ва дигар омилҳои номатлуб аз ҷониби Кумита ва зерсохторҳои он тавассути гардиши “хона ба хона” бо 502 ҳазору 931 оилаҳо суҳбатҳо ва бо усули “маҳал ба маҳал” 1896 адад корҳои тарғиботию ташвиқотӣ ва итилоотӣ анҷом дода шудааст.

Шаҳноза АЗИМОВА, “ҶТ”