10 август дар шаҳри Бохтар ба муносибати Рӯзи варзишгарон чорабинии тантанавии вилоятӣ баргузор гардид. Дар чорабинӣ Абдулло Раҳмонзода, муовини раиси вилояти Хатлон, Рамазон Насриддинзода, сардори Раёсати кор бо ҷавонон ва варзиши вилоят, собиқадорони соҳа, мураббиён, варзишгарон ва дӯстдорони варзиш иштирок намуданд.

Чорабинӣ бо шиносоии меҳмонон аз намоиши дастовардҳои соҳаи варзиш оғоз гардид. Дар гулгашти назди Нишони давлатии Ҷумҳурии Тоҷикистон намудҳои гуногуни варзиш ва дастовардҳои варзишгарони вилоят ба маъраз гузошта шуд. Меҳмонон аз дастовардҳои варзишгарони ҷавон, имкониятҳои мавҷуда ва намунаҳои рушди соҳаи тарбияи ҷисмонӣ ва варзиш дар шаҳру ноҳияҳои вилояти Хатлон дидан намуданд.

Сипас, Абдулло Раҳмонзода аз номи раиси вилояти Хатлон кулли варзишгарон, мураббиён, собиқадорон ва кормандони соҳаро ба муносибати Рӯзи варзишгарон табрик намуд.

Ӯ зимни суханронӣ таъкид кард, ки дар вилояти Хатлон бо татбиқи сиёсати созандаи давлат ва дастуру ҳидоятҳои Пешвои миллат барои рушди соҳаи тарбияи ҷисмонӣ ва варзиш тадбирҳои пайваста амалӣ мешаванд.

- Танҳо дар панҷ соли охир дар шаҳру ноҳияҳои вилояти Хатлон 171 иншооти варзишӣ бо маблағи умумии 241,5 миллион сомонӣ сохта, ба истифода дода шудааст. Иншооти нав, толорҳои замонавӣ ва майдончаҳои муҷаҳҳази варзишӣ барои омодасозии варзишгарони оянда ва ҷалби бештари аҳолӣ ба тарбияи ҷисмонӣ заминаи мусоид фароҳам овардаанд. Дар шаш моҳи соли 2026 бошад, дар ҳудуди вилоят 26 иншооти варзишӣ бо маблағи 13,7 миллион сомонӣ ба истифода дода шуда, дар 53 иншооти дигар корҳои сохтмонӣ идома доранд,-афзуд А. Раҳмонзода.

Зимни чорабинӣ таъкид гардид, ки дар шароити тағйирёбандаи ҷаҳони муосир ва афзоиши зуҳуроти хатарнок ҷалби наврасону ҷавонон ба варзиш аҳамияти бештар пайдо мекунад. Зеро варзиш на танҳо саломатии ҷисмонӣ, балки ирода, масъулиятшиносӣ, интизом ва руҳияи ватандӯстии ҷавононро низ ташаккул медиҳад.

Дар идомаи чорабинӣ ба як қатор собиқадорони соҳа, варзишгарон ва мураббиён барои саҳми арзандаашон дар рушди соҳаи тарбияи ҷисмонӣ ва варзиш Сипоснома тақдим карда шуд. Ҳамзамон, ғолибону ҷоизадорони Ҷоми раиси вилояти Хатлон оид ба футбол бо туҳфаҳои хотиравӣ қадрдонӣ гардиданд.

Чорабинии идона бо барномаи рангини консертии аҳли фарҳанги вилоят идома ёфта, хотири меҳмонон, варзишгарон ва сокинони шаҳри Бохтарро болида намуд.

Сулаймон САИДЗОДА, рӯзноманигор