Имрӯз дар Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба муносибати Рӯзи байналмилалии волонтёрон чорабинии тантанавӣ баргузор гардид.

Дар чорабинии мазкур Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Каримзода Равшан, муовини вазири маориф ва илм, Хонзода Абдураҳмон, роҳбари дастгоҳи Кумитаи иҷроияи марказии ҲХДТ, Шукурзода Исфандиёр, муовини якуми раиси Кумитаи ҳифзи муҳити зист, Набизода Мадина, муовини якуми Кумитаи кор бо занон ва оила ва намояндагони дигар сохторҳо иштирок ва суханронӣ намуданд.

Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон зимни суханронии ифтитоҳии худ таъкид дошт, ки таҷлили Рӯзи байналмилалии волонтёрон дар фазои суботу оромии кишвар ва таҳти роҳбарии хирадмандонаи Пешвои миллат муҳтарам Эмомалӣ Раҳмон имкони фароҳамовардаи давлатӣ барои рушди ҳаракати волонтёрӣ мебошад. Волонтёрӣ дар Тоҷикистон ба низоми мукаммал табдил ёфта, яке аз самтҳои афзалиятноки сиёсати давлатии ҷавонон ба ҳисоб меравад.

Раиси Кумита ҳамчунин қабули Қонуни Ҷумҳурии Тоҷикистон “Дар бораи фаъолияти волонтёрӣ”-ро қадами муҳим дар густариши ташаббусҳои созандаи ҷавонон маънидод намуда, нақши волонтёронро дар татбиқи барномаҳои иҷтимоӣ, фарҳангӣ, маорифӣ, варзишӣ ва маърифатӣ муҳим арзёбӣ кард.

Дар анҷоми ҳамоиш ба волонтёрони фаъол аз ВМКБ, вилоятҳои Хатлону Суғд ва дигар шаҳру ноҳияҳои кишвар аз ҷониби Кумитаи кор бо ҷавонон ва варзиш туҳфаҳои хотиравӣ, сипоснома ва ифтихорномаҳо тақдим карда шуданд.
Дар охир барномаи фарҳангӣ пешкаши ҳозирин гардонида шуд.

М. МУҚАДДАМОВА, “ҶТ”