ҶОМЕА
Шанбе 22 Июн 2024 12:18
10139
Шуруъ 1 – уми апрели соли равон дар Ҷумҳурии Тоҷикистон даъвати баҳорӣ ба сафи Қувваҳои мусаллаҳои Қувваҳои мусаллаҳи ҷумҳурӣ оғоз ёфт. Ин маърака муддати ду моҳ, то 30-юми май идома хоҳад кард.

Дар асоси Фармони Президенти Ҷумҳурии Тоҷикистон “Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1997-2006 Ҷумҳурии Тоҷикистон ба хизмати ҳарбӣ”, аз 5 марти соли 2024, №791, моҳҳои апрел-майи соли 2024 шаҳрвандони ҷинси марди то рӯзи даъват ба синни 18 расида, инчунин шаҳрвандони синни калонтари Ҷумҳурии Тоҷикистон, ки ҳуқуқи ба таъхир андохтани муҳлати даъват ё озод будан аз даъват ба хизмати ҳарбиро надоранд, барои хизмат ба сафи Қувваҳои Мусаллаҳи Ҷумҳурии Тоҷикистон, қӯшунҳои сарҳадии Кумитаи давлатии амнияти миллии Ҷумҳурии Тоҷикистон, Гвардияи миллии Ҷумҳурии Тоҷикистон, қӯшунҳои дохилии Вазорати корҳои дохилии Ҷумҳурии Тоҷикистон, қӯшунҳои мудофиаи граждании Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон, бригадаи посбоникунандаи сарраёсати иҷрои ҷазои ҷиноятии Вазорати адлияи Ҷумҳурии Тоҷикистон, баталиони кишоварзии Агентии таъминоти амволи махсуси назди Ҳукумати Ҷумҳурии Тоҷикистон даъват карда мешаванд.

Аллакай дар рӯзи аввали даъват бархе аз минтақаҳои кишвар нақшаро ба таври пурра иҷро намуданд.

Бояд гуфт, ки бо мусоид гардидани шароити хуби хизмат дар қисмҳои низомии кившар, аксарияти ҷавонон имрӯз ба таври ихтиёрӣ ба комиссариатҳои ҳарбӣ ҳозир гардида, барои адои қарзи шаҳрвандии худ изҳорӣ омодагӣ менамоянд.


ВМКБ аввалан шуда нақшаро иҷро кард

Вилояти Мухтори Кӯҳистони Бадахшон нахустин шуда, нақшаи даъватро иҷро намуд.

Ба иттилои Мақомоти иҷрояи ҳокимияти давлатии ВМКБ, вилоят соли шашум аст, ки нақшаи даъвати ҷавонписарон дар як рӯз пурра иҷро мекунад.

Ҳукумати ВМКБ зикр намуд, ки дар маъракаи даъвати соли ҷорӣ низ, бо дарки баланди масъулияти шаҳрвандӣ, қисми зиёди даъватшудагон, ки дар хориҷи кишвар, аз ҷумла Русия, Олмон, Руминия ва дигар давлатҳо қарор доштанд, бо гирифтани даъватнома ба Ватан баргаштанду ба хидмат раҳсипор шуданд.

Раиси вилоят Алишер Мирзонабот иҷрои нақшаи даъват дар як рӯзро муносибати масъулиятнок ва ватандӯстии ҷавонони вилоят арзёбӣ намуда, аз қавли Сарвари давлат онро намунаи ибрат барои дигарон хонд.


Хатлон: чор ноҳия нақшаро пурра иҷро кард

Чор ноҳияи вилояти Хатлон аз ҷумла, ноҳияҳои Вахш, Фархор, Муъминобод ва Хуросони вилояти Хатлон иҷро намуданд.

Бахшида ба оғози мавсими даъвати баҳории ҷавонон ба сафи Қувваҳои Мусаллаҳ дар ин чор ноҳия чорабиниҳо таҳти унвони “Рӯзи даъватшаванда” баргузор карда шуд.

Дар ин ноҳияҳо низ бо иштироки намояндагони ноҳияҳо, даъватшавандагон ва волидони онҳо ва ҷавонони синни тодаъватӣ чорабинии бошукӯҳ доир гардида, онҳоро ботантана ба сафи артиш даъват намуданд.

Хизмат дар сафи Қувваҳои Мусаллаҳ қарзи шаҳрвандӣ ба ҳисоб рафта, вазъи мураккаби ҷаҳони имрӯз аз ҳар фарди бедордил, ҷавонони бонангу номус тақозо менамояд, то дар самти ҳимояи Истиқлоли давлатӣ ва марзу буми худ аз ҳарвақта дида, масъулияти бештар эҳсос кунанд. Зеро бархӯрди манфиатҳои мамлакатҳои абарқудрат ва марҳилаи нави муборизаҳои байни кишварҳо вуҷуд доранд, нишон медиҳанд, ки ҳатто давлатҳои садсолаҳо мавҷудбуда дар пайи аз байн рафтан ҳастанд. Миллатҳо дар вазъияти хеле мураккаби ноором мебошанд. Аз ин рӯ, вақти он расидааст, ки пайи ҳифзи Ватани соҳибистиқлоламон бештар талош варзем.


Дар Суғд Исфара пешсаф аст

Ҷамоатҳои Воруху Чоркӯҳ ва Чилгазиву Лаккони шаҳри Исфара низ дар нахустин рӯзи маъракаи даъвати баҳории ҷавонон нақшаи сафарбаршавӣ ба артишро буд кардаанд.

Ба гуфтаи масъулин дар миёни наваскарон даҳҳо ҷавононе шомил ҳастанд, ки барои иҷрои масъулияти шаҳрвандӣ ихтиёран азми рафтан ба хизмат дар сафи артишро кардаанд.

Дар Исфара дирӯз ба муносибати гусели наваскарон дар маркази Исфара чорабинии фарҳангӣ доир шуда, дар он ба ҳисоби раиси шаҳри Исфара, масъулони мақомоти ҳифзи ҳуқуқ ширкат варзидаанд.

Фарзонаи УМАРАЛӢ, “ҶТ”

Эзоҳи худро нависед



Рамзҳо дар расм