ҶОМЕА
Шанбе 22 Июн 2024 11:51
10209
Вакилони ташкилот раиси нави худро интихоб карданд

Имрӯз дар бинои марказии Донишгоҳи миллии Тоҷикистон анҷумани IV-уми ташкилоти ҷамъиятии “Пайравони Пешвои миллат” доир гардид.

Дар чорабинии мазкур Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, аъзои раёсат ва вакилони ташкилоти мазкур иштирок намуданд.

Чорабинӣ бо садо додани Суруди миллӣ оғоз гардида, дар қисмати аввали он фаъолияти ташкилоти ҷамъиятии “Пайравони Пешвои миллат” дар соли 2023 натиҷагирӣ карда шуда, дар идома ҳамчунин нақшаи фаъолияти ташкилоти мазкур барои соли 2024 тасдиқ карда шуд.

Сипас, бо тариқи овоздиҳии якдилона Зулфиқор Гулаҳмадзода, раиси КҶВ, раиси ташкилоти ҷамъиятии “Пайравони Пешвои миллат” интихоб гардид.

Инчунин, дар рафти чорабинӣ муовинони раис, роҳбарият ва вакилони нави ташкилоти ҷамъиятии “Пайравони Пешвои миллат” аз тарафи иштирокчиён интихоб гардиданд.

Зулфиқор Гулаҳмадзода, раиси нави ташкилоти ҷамъиятии “Пайравони Пешвои миллат” зимни суханронии хеш аз аъзоёни ташкилот баҳри роҳбари ин ташкилот интихоб намуданашон изҳори сипос баён намуд.

- Имрӯз мо насли ҷавон бояд он эътимодеро, ки Пешвои миллат нисбат ба мо - ҷавонон доранд, ҷавобгӯ бошем ва ин аз ҳар яки мо масъулияти баландро дар назди Ватан - Модар ва ҷомеаву халқи азизамон талаб менамояд. Дар баробари ин моро вазифадор месозад, ки бо неруи созандаву бунёдкор пайи омӯзиш рафта, дар пешрафту тараққиёти тамоми соҳаҳои ҷомеа нақши худро гузорем, - иброз дошт, Зулфиқор Гулаҳмадзода.

Ҳамин тавр, анҷумани IV-уми ташкилоти ҷамъиятии “Пайравони Пешвои миллат” ба анҷом расид.

Ҳошим РАҲМАТУЛЛОЕВ, “ҶТ”

Эзоҳи худро нависед



Рамзҳо дар расм