9 январ дар ноҳияи Восеъ ҳамоиши занон ва ҷавондухтарон таҳти унвони “Занон ва Паём” баргузор гардид.

Дар ин бора аз Кумитаи кор бо занон ва оилаи назди Ҳукумати Ҷумҳурии Тоҷикистон хабар доданд.

Дар ҳамоиши мазкур Бунафша Файзиддинзода, раиси Кумитаи кор бо занон ва оила, Анзурат Абдусаломзода, муовини раиси вилояти Хатлон, Ҷамшед Шарифзода, раиси ноҳия ва занону духтарони фаъоли шаҳру ноҳияҳои минтақаи Кӯлоб, иштирок ва суханронӣ намуданд.

Файзиддинзода Бунафша, зимни суханронии худ оид ба мавқеи занон дар Ҷумҳурии Тоҷикистон, нуқтаҳои асосии Паёми имсоларо бо овардани арқоми мушаххас дар самти пешравиҳои соҳаҳои гуногуни хоҷагии халқи мамлакат, оид ба Фармони Президенти Ҷумҳурии Тоҷикистон "Доир ба баланд бардоштани мақоми зан дар Ҷумҳурии Тоҷикистон", иҷроиши барномаҳои давлатӣ дар самти рушди оила ва пешгирии хушунати оилавӣ, тарзи гирифтани Грантҳои президентӣ дар самти рушди ҳунарҳои мардумӣ ва ташкили корхонаҳо бо ҷалби занону духтарони қобили меҳнат ва дигар паҳлуҳои баланд бардоштани мавқеи зан дар Тоҷикистонро ёдрас намуд.

Ҳамзамон, аз ҷониби дигар намояндагони ин ниҳод маърӯзаҳо шунида шуда, сипас ба як қатор собиқадорон ва фаъолзанони шаҳру навоҳии минтақаи Кӯлоб сипоснома ва туҳфаҳои хотиравӣ тақдим карда шуд.

Наҷиба МУРОДБЕКОВА, “ҶТ”