Имрӯз - 18 март дар Кохи Суруши шаҳри Душанбе маросими ҷоизасупории озмуни байналмилалии “100 чеҳраи муваффақ” баргузор гардид.

Озмуни мазкур чанде қабл бо ташаббуси Ташкилоти ҷамъиятии байналмилалии “Маркази рушди зеҳнӣ” бори аввал ва аз рӯи 10 номинатсия роҳандозӣ гардид.

Тавре “Маркази рушди зеҳнӣ” дар гурӯҳи фейсбукии худ хабар додааст, аз санаи 8 декабр то санаи 10-уми март ба унвонии Коммисияи озмуни мазкур тариқи зангҳои телефонӣ 511 нафар, тариқи Watsapp 479 нафар, тариқи Телеграм 109 нафар, тариқи Инстаграм 346 нафар ва тариқи почтаи электронӣ 63 нафар муроҷиат кардаанд.

Гуфта мешавад, ки дар умум ба Комиссияи озмун 601 адад анкета ворид шуда, аз ин миқдор анкетаи 219 нафар иштирокчиён бинобар нопурра ва ғалат будан баррасӣ нашудаанд.

Бояд гуфт, ки дар озмуни мазкур хоҳишмандони касбу кори гуногун бо пешниҳоди мақомоте, ки дар он фаъолият мекунад ва ё ба таври худ пешбар, метавонистанд иштирок намоянд.

Ҳамзамон корбарони шабакаҳои иҷтимоӣ имкон доштанд номзадҳоеро, ки ба ақидаи онҳо муваффақ аст, ба озмуни мазкур пешниҳод намоянд.