Бино ба иттилои Кумитаи дин, танзими анъана ва ҷашну маросими назди Ҳукумати Ҷумҳурии Тоҷикистон соли 2024 дар кишвар нисбати 1435 нафар парвандаи ҳуқуқвайронкунии маъмурӣ баррасӣ гардидааст, ки нисбати ҳамин давраи соли 2023, 609 ҳолат зиёд аст.

Ин нуктаро имрӯз Сулаймон Давлатзода, раиси Кумитаи мазкур зимни нишасти хабарӣ бо рӯзноманигорон иттилоъ баён намуд.
Ӯ гуфт, вобаста ба риоя нагардидани талаботи Қонуни Ҷумҳурии Тоҷикистон "Дар бораи танзими ҷашну маросим дар Ҷумҳурии Тоҷикистон" 1435 парвандаи ҳуқуқвайронкунии маъмурӣ тартиб дода шуда, нисбати 1409 ҳолат ҷазо таъин гардида, 26 парванда ҳангоми баррасӣ аз ҷониби судҳо қатъ шудааст.

Ӯ зикр кард, ки маблағи умумии ҷаримаҳои муқарраргардида 11 миллиону 95 ҳазору 560 сомониро ташкил медиҳад, ки аз ин миқдор 6 миллиону 639 ҳазору 535 сомонӣ рӯёнида шудааст.

Инчунин қайд гардид, ки мутобиқи маълумоти пешниҳоднамудаи комиссияҳои доимии танзими анъана ва ҷашну маросими мақомоти иҷроияи ҳокимияти давлатии вилоятҳо ва шаҳру ноҳияҳо аз ҷараёни баргузории маъракаҳо 27 078 рейд - дар шаҳри Душанбе 6976, ВМКБ 360, вилояти Суғд 3953, вилояти Хатлон 7667, шаҳру ноҳияҳои тобеи ҷумҳурӣ 8122 гузаронида шудааст.

Фарзонаи УМАРАЛӢ, “ҶТ”