Дар Тоҷикистон аксияи ҷумҳуриявии “Ҳафтаи саломатӣ ва ҳуқуқи инсон дар Тоҷикистон”, ки ба Рӯзи умумиҷаҳонии саломатӣ бахшида шудааст, оғоз гардид.

Дар ин бора, аз маркази матбуотии Вазорати тандурустӣ ва ҳифзи иҷтимоии аҳолии Тоҷикистон хабар доданд.

Ба иттилои манбаъ, чорабинии мазкур рӯзҳои 6, 7 ва 8-уми апрел дар тамоми муассисаҳои табобатию пешгирии шаҳри Душанбе, вилоятҳои Суғду Хатлон, ВМКБ ва шаҳру ноҳияҳои ҷумҳурӣ зери унвони “Якҷоя ба сӯи саломатӣ. Якҷоя ба сӯи илм”, баргузор шуда, се рӯз идома мекунад.

Гуфта мешавад, ки рӯзи 6 апрел чорабинӣ дар Муассисаи давлатии “Пажӯҳишгоҳи гастроэнторологии Ҷумҳурии Тоҷикистон” оғоз гардида, рӯзи 7 апрел дар тамоми муассисаҳои табобатию пешгирии шаҳри Душанбе, вилоятҳои Суғду Хатлон ва шаҳру навоҳии ҷумҳурӣ ва рӯзи охир бошад дар муассисаҳои тандурустӣ ВМКБ баргузор мегардад.

“Аз шаҳрвандони мамлакат даъват ба амал оварда мешавад, ки дар рӯз ва вақти муайянгашта ба муассисаҳои тандурустии маҳалли зисти худ ташриф оварда, хизматрасонии тиббии ройгон бигиранд”, - омадааст дар хабар.

Сафиаллоҳ ИБОДЗОДА,
“ҶТ”