4-уми июн Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати кишвар дар доираи сафари корӣ ба ноҳияи Рашт ба корҳои сохтмонии "Маркази ҷавонон"-и ноҳия ҳусни оғоз бахшид.

Сохтмони иншооти мазкур бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Мақомоти иҷроияи ҳокимияти давлатии ноҳияи Рашт дар ҳамкорӣ бо соҳибкорону шахсони ташаббускор рӯи даст гирифта шудааст.

Дар вохӯрии мазкур Зулфиқор Гулаҳмадзода, раиси Кумита ва Заррина Идизода, раиси ноҳияи Рашт иштирок карда, ба соҳибкорону ташаббускорони маҳаллӣ ва ҷавонону сохтмончиён оид ба иқдоми пешгирифтаашон изҳори сипосу миннатдорӣ баён намуданд.

Ҳамзамон, бо пайравӣ аз сиёсати пешгирифтаи созандаи Пешвои миллат Кумитаи кор бо ҷавонон ва варзиш, ҷавонони фаъоли ташаббускори маҳаллии ноҳияҳои Рашт ва Тоҷикобод тасмим гирифтаанд, ки ба оилаҳои аз офати табиӣ зарардидаи ин минтақа хонаҳои истиқоматӣ бунёд карда, дар баробари ин азнавсозии чор майдончаи варзишии ноҳияҳои мазкурро низ ба зимма гирифтанд, ки то арафаи таҷлили ҷашни Истиқлоли давлатӣ сохта ба истифода дода мешавад.

Ҳ. РАҲМАТУЛЛОЕВ, “ҶТ”