Некрӯз Салимов муштзани тоҷик дар вазни 80 кг дар Чемпионати Осиё оид ба бокс, ки дар шаҳри Улан-Батори Муғулистон ҷараён дорад, соҳиби нишони биринҷӣ гардид.

Некрӯз Салимов дар марҳилаи нимниҳоии чемпионат бо намояндаи Урдун - Хусейн Ишаиш нерусанҷӣ намуд. Салимов бо зарбаҳои ҳадафрас се раунд муқобили муштзани урдунӣ рақобат кард ва дар охир бо қарори ҷудогонаи доварон бо ҳисоби 4 бар 1 пирӯзӣ ба фоидаи Хусейн Ишаиш дода шуд.

Муштзани тоҷик ҳамин тавр медали биринҷии мусобиқаро ба даст овард, ки барояш нахустин нишони биринҷии Чемпионати Осиё мебошад.

Некрӯз то расидан ба даври нимҳиҳоӣ дар марҳилаи ҳаштякниҳоӣ намояндаи Ҷопон – Кай Торийаберо тариқи нокаут шикаст дода, дар марҳилаи чаҳорякниҳоӣ бар намояндаи Индонезия –Майихел Роберрд Мускита бо ҳисоби 5:0 ғолиб омада буд.

Ин дуюмин медали биринҷии Тоҷикистон дар Чемпионати Осиёи соли 2026 дар шаҳри Улан-Батори Муғулистон мебошад.

Ёдовар мешавем, ки Чемпионати Осиё оид ба бокс 30 март дар шаҳри Улан-Батори Муғулистон оғоз шуда, то 10 апрел идома мекунад. Дар мусобиқаи мазкур намояндагони 25 кишвар ва 230 муштзан ширкат доранд. Ин мусобиқа таҳти сарпарастии World Boxing баргузор шуда истодааст.

“ҶТ”