Дар Душанбе Конференсияи илмӣ-назарриявӣ дар мавзӯи “Нақши Ваҳдати миллӣ дар рушди варзиш ва таҳкими ҳаракати олимпӣ” баргузор гардид.

Имрӯз - 23 июн, дар толори Телевизиони “Душанбе” конференсияи илмӣ-назариявӣ таҳти унвони “Нақши Ваҳдати миллӣ дар рушди варзиш ва таҳкими ҳаракати олимпӣ” баргузор шуд.

Дар ҳамоиш Шокирзода Муҳаммадтолиб, муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Муҳаммадшо Абдулозода, Котиби генералии Кумитаи миллии олимпии Тоҷикистон, Амир Иброҳимзода, ректори Донишкадаи тарбияи ҷисмонии Тоҷикистон варзишгарони маъруф, аз ҷумла Темур Раҳимов, Мавзуна Чориева ва олимону дигар намояндагони соҳаи варзиши кишвар иштирок намуданд.

Зимни баргузории конференсия таъкид гардид, ки Ваҳдати миллӣ барои рушди соҳаи варзиш, таҳкими ҳаракати олимпӣ ва фароҳам овардани шароити мусоид ҷиҳати дастовардҳои варзишгарони тоҷик дар арсаи байналмилалӣ заминаи устувор гузоштааст.

Дар анҷоми конференсия ба як қатор роҳбарони муассисаҳои варзишӣ, мураббиён, методистон ва варзишгароне, ки дар рушди соҳаи варзиш ва таҳкими ҳаракати олимпӣ саҳми назаррас гузоштаанд, сипосномаҳои Кумитаи кор бо ҷавонон ва варзиши назди Ҳукумати Ҷумҳурии Тоҷикистон тақдим гардид. Иштирокчиён баргузории чунин ҳамоишҳоро барои тарғиби арзишҳои Ваҳдати миллӣ, рушди варзиш ва баланд бардоштани ҳисси ватандӯстии ҷавонон муҳим арзёбӣ намуданд.

Рустам САМИЕВ, “ҶТ”